“Tez yordam va o‘t o‘chiruvchilar blokpostlar qayerga o‘rnatilganini biladi” — Shohrux G‘iyosov

O‘zbekiston Prezidenti Shavkat Mirziyoyev raisligida o‘tgan videoselektor yig‘ilishida Toshkentda uch kun ichida tez yordamning vaqtida yetib bormagani oqibatida 43 kishi vafot etgani ma’lum qilingandi. Bunga tez yordam mashinalarining yetishmasligi sabab qilib ko‘rsatilgan.

Ayrim internet foydalanuvchilari tez yordamlarning ushlanib qolishiga shahardagi blokpostlar va mahallarga kirishda o‘rnatilgan beton to‘siqlar sabab bo‘lgan, deya taxmin qilmoqda. Ichki ishlar vazirligi matbuot kotibi Shohrux G‘iyosov blokpostlar o‘rni hukumat komissiyasi bilan, beton to‘siqlar esa hokimliklar qoshidagi ishchi guruhlar bilan kelishilgan holda o‘rnatilganini ma’lum qildi, deb yozadi “Gazeta.uz”.

“Toshkent shahri va viloyati hokimlarida cheklov choralarini ko‘rish uchun qancha kuch va resurslar kerakligini o‘zlari belgilash vakolati mavjud. Komissiyada Sog‘liqni saqlash vazirligi, FVV, Ichki ishlar vazirligi, Yong‘in xavfsizligi va boshqa tashkilot vakillari bor — ular mahallalarga kirishda ushbu beton to‘siqlarni qayerga qo‘yish lozimligini tavsiya qiladi. O‘t o‘chiruvchilar  va tez yordamda maxsus xarita bo‘lib, ular blokpostlar qayerga o‘rnatilganini ko‘ra oladi. Bu oddiy emas, barchasi kelishilgan.

Shu sababli ular qayerdan kirishni biladi. Tirbandliklar yuzaga kelsa, joyida hal etiladi”, — deydi Shohrux G‘iyosov.

IIV vakili poytaxt bo‘ylab nechta blokpost va beton to‘siqlar o‘rnatilganiga aniqlik kiritmagan.

Shuningdek, Prezident Toshkent shahridagi vaziyatni sharmandalik deb atadi hamda ikki hudud rahbarlarini tanqid qildi. Koronavirusga qarshi kurashni samarali tashkil qilmagani uchun sog‘liqni saqlash vaziri Alisher Shodmonov va Toshkent shahar hokimi Jahongir Ortiqxo‘jayevga hayfsan berdi.