“Sizlar hozirgi siyosatimizga, xalqimizga xiyonat qilyapsizlar” — Shavkat Mirziyoyev COVID-19 sababli Toshkent shahri va viloyati rahbarlarini tanqid qildi

Prezident Shavkat Mirziyoyev 15-iyul, chorshanba kuni Toshkent shahri va Toshkent viloyatida pandemiya bilan bog‘liq vaziyat muhokamasiga bag‘ishlangan videoselektor yig‘ilishi o‘tkazgani va unda koronavirusga qarshi kurashni samarali tashkil qilmagani uchun sog‘liqni saqlash vaziri Alisher Shodmonov va Toshkent shahar hokimi Jahongir Ortiqxo‘jayevga hayfsan bergani haqida xabar qilingandi.

Shavkat Mirziyoyevning so‘zlariga ko‘ra, koronavirus bo‘yicha respublikadagi eng og‘ir vaziyat Toshkent shahri va Toshkent viloyatida kuzatilmoqda. Prezidentning qayd etishicha, butun dunyoda koronavirusga qarshi kurash ketayotgan vaqtda Toshkent shahri va Toshkent viloyatida “jilov bo‘sh qo‘yilgani” sababli bugungi vaziyat talabga javob bermaydi. “Odamlarning noroziligi yuzaga kelgani ham haqiqat”, — dedi davlat rahbari.

“Bu yerda o‘tirgan rahbarlar, sizlar siyosatni tushunasizlarmi, yo‘qmi? Dunyoda qanday iqtisodiyot bo‘lyapti, vabo bilan qanday kurashilyapti, nimani tahlil qilyapsizlar, degan savol meni qiynaydi”, — deya savol qo‘ydi Prezident.

Davlat rahbari koronavirus bilan bog‘liq murakkab vaziyatdan chiqib ketish bo‘yicha Andijon, Namangan, Farg‘ona va Samarqand viloyatlarini misol qilib ko‘rsatdi hamda og‘ir sharoitdan mazkur hududlardagi birinchi rahbarlar fidoyiligi, qattiqqo‘lligi uchun chiqib ketilganini ta’kidladi.

“Toshkentda nima bo‘ldi? Toshkent viloyati nima bo‘ldi? Hokimlar va sektor rahbarlari o‘z hududidagi haqiqiy ahvolni umuman o‘rganmagan va ‘pastga tushmagan’. Sizlar hozirgi siyosatimizga, xalqimizga xiyonat qilyapsizlar. Qanday achchiq bo‘lsa ham, baho mana shunday.

Urush paytidagi vaziyat hozir. Urushda faqat xalqning tinchligi, xalqning osoyishtaligi, xalqning sog‘lig‘ini o‘ylashimiz kerak. Eng asosiysi, birinchi rahbarlar tushunishni xohlamayapti. Ular o‘zlarining hududlaridagi tibbiyot muassasalariga biron marta kirmasdan, ular bilan uchrashmasdan, real vaziyatni o‘rganmagan va ko‘rmagan, desak adolatdan bo‘ladi”, — dedi Prezidenti.

Shavkat Mirziyoyev Toshkent shahri va viloyatida aholini virusdan ogohlantirish va saqlash, kasallikni o‘z vaqtida va to‘g‘ri davolash uchun mas’uliyat umuman his qilnmaganini tanqid qildi.

Sog‘liqni saqlash vazirligi tomonidan ham keyingi bir oyda koronavirusni davolash strategiyasi va taktikasi keskin buzilgani, real holatdan kelib chiqib, davolash amaliyoti o‘zgartirilmagani tanqid ostiga olindi.

“Shifokorlar tomonidan bemorlarga nisbatan befarqlik va sovuqqonlik holatlariga ham yo‘l qo‘yilmoqda”, — dedi davlat rahbari.

Shavkat Mirziyoyev O‘zbekiston bo‘yicha jami kasallarning 40 foizi Toshkent shahriga to‘g‘ri kelayotganini qayd etib o‘tdi.

“Agar bu yerda sadoqatli odamlar o‘tirganida, siyosatga xayrixoh odamlar o‘tirganida, Toshkentda shunday sharmandalik mumkinmidi? Toshkentda iloji bor-ku hamma narsaning” — dedi Prezident.

Shuningdek, yig‘ilishda bu ikki hududda koronavirus tarqalishiga qarshi kurash va aholini davolash ishlariga aloqador barcha vazirlik va idoralar, yirik tibbiyot muassasalari rahbarlaridan iborat 24 soat ishlaydigan shtablar tashkil qilish ko‘rsatmasi berildi.

Toshkent shahri va viloyatidagi poliklinikalar huzuridagi mobil guruhlar sonini uch barobar ko‘paytirish vazifasi yuklatildi. Zangiota tumanida yaqinda ish boshlagan shifoxonadagi joy sonini yana 1000 o‘ringa ko‘paytirish topshirig‘i berildi.

Eslatib o‘tamiz, Shavkat Mirziyoyev 14-iyul kuni o‘tkazilgan videoselektorda koronavirusga qarshi kurash uchun mamlakatda barcha zaxira va imkoniyatlar mavjudligini ta’kidladi, biroq hozirda epidemiologik vaziyat juda og‘irligini aytdi. Shuningdek, davlat rahbari koronavirusni aniqlash uchun test topshirish jarayonini soddalashtirish, hududlarda uch oylik dori zaxirasini yaratish hamda dorixonalarda va bozorlarda narxlar oshishining oldini olish bo‘yicha topshiriq berdi. Shuningdek, zarur joylarda karantin choralarini kuchaytirish bo‘yicha topshiriq berildi.