“Qo‘limizda aniq ma’lumot yo‘qligi tufayli qarorlarimiz natija bermayapti” — Shavkat Mirziyoyev koronavirusga qarshi kurash muammolari haqida

Prezident Shavkat Mirziyoyev 17-iyul, juma kuni bo‘lib o‘tayotgan videoselektor yig‘ilishida mamlakatda koronavirusga qarshi kurashda belgilangan choralar nima sababdan yetarli natija bermayotganini aytdi.

Yig‘ilishda koronavirusga qarshi kurash borasida eng katta mas’uliyat hokimlar va sektorlar rahbarlari zimmasida ekani yana bir bor eslatib o‘tildi. Buning uchun ularda o‘z hududlaridagi mavjud vaziyat haqida to‘liq va haqqoniy ma’lumotlar bo‘lishi, ular har kuni, har soatda yangilanib borishi kerakligi ta’kidlandi.

Eslatib o‘tamiz, Shavkat Mirziyoyev 14-iyul kuni har bir viloyatdagi to‘rtta sektor rahbarlariga hududlarda koronavirusga qarshi kurash masalasida choralar ko‘rish va uch oylik dori zaxirasini yaratish, dorixonalarda narxlar oshishining oldini olish bo‘yicha topshiriq bergandi.

Shuningdek, Prezident 15-iyul kuni o‘tkazilgan yig‘ilishda koronavirus bilan bog‘liq vaziyat yomonlashgani sababli Toshkent shahri va viloyati rahbarlarini tanqid qilgandi va hududdagi og‘ir vaziyatdan chiqib ketish birinchi rahbarga bog‘liq ekanligini ta’kidlagandi.