Samarqand iqtisodiyot va servis instituti dotsenti oliygohga o‘qishga kiritishni va’da qilib pora olayotganida qo‘lga tushdi. Bu haqda “Daryo”ga DXXdagi manbalari xabar berdi.
Samarqand iqtisodiyot va servis instituti dotsenti o‘zining vositachisi bo‘lgan jinoiy sherigi bilan birgalikda mahalliy fuqaroni ushbu oliy o‘quv yurtiga o‘qishga kiritib qo‘yish uchun 10 ming dollar so‘ragan.
Belgilangan pulni olayotganida DXX Samarqand viloyati boshqarmasi va viloyat ichki ishlar boshqarmasi hamkorligida o‘tkazilgan tezkor tadbir davomida ushlangan.
Ta’kidlanishicha, mazkur shaxs ish faoliyatida yo‘l qo‘ygan qo‘pol kamchiliklari tufayli institut rahbariyati tomonidan 2018-yilda ishdan bo‘shatilgan. Lekin u nohaq bo‘shatilganligini ro‘kach qilib, sud idoralariga murojaat qilishi natijasida 2020-yilning 2-iyulida qaytadan ishga qabul qilingan. Ammo oradan bir necha kun o‘tib, jinoiy ishga qo‘l urgan.
Hozirda aniqlangan holat yuzasidan Jinoyat kodeksining tegishli moddalariga asosan jinoyat ishlari qo‘zg‘atilib, tergov harakatlari doirasida ushbu noqonuniy ishga aloqador bo‘lgan shaxslarni aniqlash bo‘yicha zarur chora-tadbirlar amalga oshirilmoqda.
Avvalroq Samarqandda universitetga o‘qishga kiritib qo‘yishi evaziga 6 ming dollar so‘ragan fizika o‘qituvchisi qo‘lga olingani, shu maqsadda 2 ming dollar pora olgan Samarqand davlat arxitektura-qurilish instituti o‘qituvchisi ushlangani xabar berilgan edi.
Izoh (0)