Самарқанд иқтисодиёт ва сервис институти доценти олийгоҳга ўқишга киритишни ваъда қилиб пора олаётганида қўлга тушди. Бу ҳақда «Дарё»га ДХХдаги манбалари хабар берди.
Самарқанд иқтисодиёт ва сервис институти доценти ўзининг воситачиси бўлган жиноий шериги билан биргаликда маҳаллий фуқарони ушбу олий ўқув юртига ўқишга киритиб қўйиш учун 10 минг доллар сўраган.
Белгиланган пулни олаётганида ДХХ Самарқанд вилояти бошқармаси ва вилоят ички ишлар бошқармаси ҳамкорлигида ўтказилган тезкор тадбир давомида ушланган.
Таъкидланишича, мазкур шахс иш фаолиятида йўл қўйган қўпол камчиликлари туфайли институт раҳбарияти томонидан 2018 йилда ишдан бўшатилган. Лекин у ноҳақ бўшатилганлигини рўкач қилиб, суд идораларига мурожаат қилиши натижасида 2020 йилнинг 2 июлида қайтадан ишга қабул қилинган. Аммо орадан бир неча кун ўтиб, жиноий ишга қўл урган.
Ҳозирда аниқланган ҳолат юзасидан Жиноят кодексининг тегишли моддаларига асосан жиноят ишлари қўзғатилиб, тергов ҳаракатлари доирасида ушбу ноқонуний ишга алоқадор бўлган шахсларни аниқлаш бўйича зарур чора-тадбирлар амалга оширилмоқда.
Аввалроқ Самарқандда университетга ўқишга киритиб қўйиши эвазига 6 минг доллар сўраган физика ўқитувчиси қўлга олингани, шу мақсадда 2 минг доллар пора олган Самарқанд давлат архитектура-қурилиш институти ўқитувчиси ушлангани хабар берилган эди.
Изоҳ (0)