Samarqand davlat arxitektura-qurilish instituti o‘qituvchisi 5 ming AQSh dollari evaziga oliygohga o‘qishga kiritishni va’da qilib, 2 ming dollar olgan vaqtida qo‘lga olingan. Bu haqda Samarqand IIB axborot xizmati xabar qildi.

Foto: Samarqand IIB axborot xizmati

2020-yil 16-iyun kuni Samarqand viloyati ichki ishlar boshqarmasiga fuqaro ariza bilan murojaat qilib, Samarqand davlat arxitektura-qurilish instituti o‘qituvchisi 5 ming dollar evaziga oliygohga o‘qishga kiritishni va’da qilayotgani, oldindan 2 ming dollar berishni so‘raganini aytgan. U pulning qolgan qismini o‘qishga kirgandan keyin olishini bildirganini ma’lum qilgan va unga nisbatan qonuniy chora ko‘rishni so‘ragan.

Foto: Samarqand IIB axborot xizmati

Mazkur arizaga asosan, 2020-yil 16-iyun kuni Samarqand viloyati ichki ishlar boshqarmasi jinoyat qidiruv boshqarmasi korrupsiya va iqtisodiy jinoyatlarga qarshi kurashish bo‘limi hamda DXX viloyat boshqarmasi xodimlari tomonidan tezkor tadbir o‘tkazilgan. Fuqaro ariza muallifidan 2 ming dollarni olayotgan vaqtida ashyoviy dalillar bilan ushlangan.

Avval Piskentda pedagogika universitetiga o‘qishga kiritish uchun 3,5 ming dollar olgan o‘qituvchi, Nukus davlat pedagogika institutiga o‘qishga kiritib qo‘yish uchun 3 ming dollar olgan dekan o‘rinbosari, Toshkentda konservatoriyaga o‘qishga kiritish uchun 5 ming dollar olgan o‘qituvchi, Toshkent davlat agrar universiteti Andijon filialiga 2 ming dollarga o‘qishga kiritib qo‘ymoqchi bo‘lgan sobiq o‘qituvchi, Namanganda universitetga o‘qishga kiritishni va’da qilib, 2,5 ming dollar va 5 mln so‘m talab qilgan firibgar o‘qituvchi qo‘lga tushgani haqida xabarlar berilgan edi.