Navoiy viloyati hokimi Qobil Tursunov koronavirus bilan bog‘liq vaziyat yuzasidan yviloyat aholisiga murojaat qildi. Shuningdek, hokim ijtimoiy tarmoqlar orqali koronavirus masalasida berilgan savollarga javob berdi. Bu haqda “Kun.uz” xabar qildi.
Qobir Tursunovning ma’lum qilishicha, bugungi kunda viloyatda qariyb 1 million nafar aholiga 166 ta davolash profilaktika va yordamchi muassasa tibbiy xizmat ko‘rsatmoqda. Xususiy sektorda 184 ta tibbiyot muassasasi faoliyat ko‘rsatmoqda.
Viloyatda shu vaqtga qadar 362 kishida koronavirus infeksiyasi tasdiqlangan bo‘lib, 16-iyul kunigacha ulardan 310 nafari to‘liq tuzalgan. 52 nafar bemor esa viloyatdagi 5 ta tibbiyot muassasasida davolanmoqda.
Ayni paytda viloyatda 1240 kishi uy sharoitida karantinga olingan va 60 nafarga yaqin fuqaro birlamchi aniqlangan bemor sifatida uy sharoitida davolanmoqda. Viloyatda 3 nafar o‘ta og‘ir ahvoldagi bemor kasallik oqibatida vafot etgan.
Hokimning ma’lum qilishicha, virus tarqalishining oldini olish hamda kasallanishlarni o‘z vaqtida aniqlash maqsadida 5-iyuldan boshlab viloyatda Germaniyada ishlab chiqarilgan test diagnostikumlari faoliyati yo‘lga qo‘yilgan.
Viloyatning barcha shahar va tumanlar SEOMlarida kuniga o‘rtacha 1200 dan 1500 tagacha test uchun namuna olish imkoniyati mavjud.
Viloyat Sog‘liqni saqlash boshqarmasi huzurida 5-iyuldan boshlab Call-markaz faoliyati qaytadan tashkil etildi. Markaz bilan +998 (79) 220-47-65 raqami orqali bog‘lanish mumkin.
Qobil Tursunovning bildirishicha, o‘tgan 4 oy davomida viloyat miqyosida karantin qoidalarini buzgan 8711 nafar fuqaroga nisbatan ma’muriy bayonnomalar tuzilib, jarima qo‘llanilgan. Bunda eng ko‘p jarima Navoiy shahrida — 1934 nafar, so‘ngra Zarafshon shahrida — 1513 nafar fuqaroga nisbatan qo‘llanilgan.
Eslatib o‘tamiz, Prezident Shavkat Mirziyoyev 8-iyul kuni bo‘lib o‘tgan videoselektorda mamlakatdagi koronavirus bilan bog‘liq vaziyatga to‘xtalib, viloyat rahbarlariga aholiga murojaat qilish bo‘yicha topshiriq bergandi.
Shavkat Mirziyoyev 14-iyul kuni o‘tkazilgan videoselektorda hokimlarga ertalab soat 08:00 dan 09:00 gacha va kechqurun soat 21:00 dan 22:00 gacha ijtimoiy tarmoqlarda ko‘tarilgan savollarga javob berish vazifasini qo‘ygan.
Izoh (0)