Toshkent shahar Shayxontohur tumanida yashovchi, 61 yoshli erkak F.A. koronavirusga chalinib, surunkali kasalliklar sabab vafot etdi. Mazkur bemor O‘zbekistonda COVID-19 oqibatida vafot etgan 65-bemor bo‘ldi. Bu haqda Sog‘liqni saqlash vazirligi xabar berdi.
Ma’lum qilinishicha, 61 yoshli erkak F.A. 10 kun davomida tana haroratining ko‘tarilishi, bosh og‘rig‘i, holsizlik, yo‘tal, hansirash belgilari bilan uyida davolangan. Ammo davo muolajalari natija bermagandan so‘ng COVID-19 infeksiyasiga namuna topshirgan va kasallik tasdiqlangan.
2020-yilning 13-iyul kuni bemor o‘ta og‘ir ahvolda Toshkent tibbiyot akademiyasi klinikasi reanimatsiya bo‘limiga yotqizilgan.
Unga COVID-19 infeksiyasi o‘ta og‘ir kechishi tashxisi qo‘yilgan. Kasallik ikki tomonlama bronxopnevmoniya, nafas yetishmovchiligi asoratlari bilan kechgan.
Shuningdek, u qandli diabet, yurak ishemik kasalligi, zo‘riqish stenokardiyasi, gipertoniya kabi hamroh xastaliklar bilan ham og‘rigan.
Qayd etilishicha, shifoxonada bemorning davolanishi davomida shifokorlar tomonidan onlayn konsultatsiya va konsiliumlar qilingan, davolash jarayoni mutaxassislar tavsiyasi asosida olib borilgan.
“Biroq shifokorlar tomonidan standartlar asosida o‘tkazilgan reanimatsion muolajalarga qaramasdan, bemorning ahvoli keskin og‘irlashib, o‘tkir nafas, surunkali jigar va buyrak hamda o‘pka-yurak yetishmovchiligidan vafot etdi”, — deyiladi vazirlik xabarida.
Avvalroq 14-iyul kuni Qashqadaryoda koronavirusga chalingan 56 yoshli erkak vafot etgani haqida xabar berilgandi. U O‘zbekistondagi koronavirusning 64-qurboniga aylangandi.
Izoh (0)