Тошкент шаҳар Шайхонтоҳур туманида яшовчи, 61 ёшли эркак Ф.А. коронавирусга чалиниб, сурункали касалликлар сабаб вафот этди. Мазкур бемор Ўзбекистонда COVID-19 оқибатида вафот этган 65-бемор бўлди. Бу ҳақда Соғлиқни сақлаш вазирлиги хабар берди.
Маълум қилинишича, 61 ёшли эркак Ф.А. 10 кун давомида тана ҳароратининг кўтарилиши, бош оғриғи, ҳолсизлик, йўтал, ҳансираш белгилари билан уйида даволанган. Аммо даво муолажалари натижа бермагандан сўнг COVID-19 инфекциясига намуна топширган ва касаллик тасдиқланган.
2020 йилнинг 13 июль куни бемор ўта оғир аҳволда Тошкент тиббиёт академияси клиникаси реанимация бўлимига ётқизилган.
Унга COVID-19 инфекцияси ўта оғир кечиши ташхиси қўйилган. Касаллик икки томонлама бронхопневмония, нафас етишмовчилиги асоратлари билан кечган.
Шунингдек, у қандли диабет, юрак ишемик касаллиги, зўриқиш стенокардияси, гипертония каби ҳамроҳ хасталиклар билан ҳам оғриган.
Қайд этилишича, шифохонада беморнинг даволаниши давомида шифокорлар томонидан онлайн консультация ва консилиумлар қилинган, даволаш жараёни мутахассислар тавсияси асосида олиб борилган.
«Бироқ шифокорлар томонидан стандартлар асосида ўтказилган реанимацион муолажаларга қарамасдан, беморнинг аҳволи кескин оғирлашиб, ўткир нафас, сурункали жигар ва буйрак ҳамда ўпка-юрак етишмовчилигидан вафот этди», — дейилади вазирлик хабарида.
Аввалроқ 14 июль куни Қашқадарёда коронавирусга чалинган 56 ёшли эркак вафот этгани ҳақида хабар берилганди. У Ўзбекистондаги коронавируснинг 64-қурбонига айланганди.
Изоҳ (0)