“Voqea joyiga bosh konsul yetib bordi”. O‘zbekistonning Rossiyadagi elchixonasi Amurdagi o‘zbekistonlik ishchilar isyoni nazoratga olinganini ma’lum qildi

Rossiyaning Amur viloyatida gazni qayta ishlash zavodi qurilishini amalga oshirayotgan “Renessans Xevi Indastris” kompaniyasi ishchilari uch oy davomida maosh olmaganligi sababli isyon ko‘targani, ular orasida o‘zbekistonliklar ham borligi to‘g‘risida xabar berilgandi. O‘zbekistonning Rossiyadagi elchixonasi mazkur holat nazoratga olinganini ma’lum qildi.

Ma’lumotlarga ko‘ra, O‘zbekistonning Rossiyadagi elchixonasi 13-iyul kuni Amur viloyatidagi vaqtinchalik vaxta shaharchasida O‘zbekiston fuqarolari ishtirokida yuz bergan hodisani nazoratga olgan. Mazkur masala bo‘yicha Rossiya Ichki ishlar vazirligi va boshqa vakolatli organlar bilan muntazam muloqot olib borilmoqda.

“Bo‘lib o‘tgan hodisa tafsilotlarini aniqlash hamda O‘zbekiston fuqarolarining qonuniy huquq va manfaatlari himoyasini ta‘minlash maqsadida voqea joyiga elchixona bosh konsuli yetib bordi”, — deyiladi xabarda.

Elchixona rossiyalik hamkorlar bilan birgalikda mojaroni keltirib chiqargan sabab va shart-sharoitlarni o‘rganish, muammoning barcha tomonlar uchun maqbul bo‘lgan yechimni ishlab chiqish bo‘yicha ish jarayoni va natijalar haqida qo‘shimcha axborot beradi.

Amur viloyati prokuraturasi tomonidan ma’lum qilinishicha, holat yuzasidan xorijlik ishchilarning mehnat huquqining buzilishi bo‘yicha tekshiruv boshlangan. Shu bilan birga, tartibsizlikni yuzaga keltirgan ishchilarga nisbatan “Bezorilik” moddasi bilan jinoyat ishi qo‘zg‘atilgan.