Tojikiston—O‘zbekiston chegarasidagi “Oybek” nazorat-o‘tkazish puntida 200-250 ta yuk mashinasi ishtirokida tirbandlik yuzaga keldi. Yuk mashinalari haydovchilar COVID-19’ga topshirgan test natijalarini bir necha kun kutishga to‘g‘ri kelayotgani sabab to‘xtab qolgan. Bu haqda chegara postida qolib ketgan haydovchilardan biriga tayanib, “Fergana.ru” xabar berdi.
Ta’kidlanishicha, kunlik ovqatlanish uchun 100 ming so‘m ketmoqda, bir hafta va undan ortiq vaqtdan beri nazorat-o‘tkazish punktida qolib ketganlarning pullari tugamoqda. Shuningdek, haydovchilar issiq ob-havo sharoitida qizib ketadigan yuk mashinasi kabinasida yashashga majbur bo‘lyapti. Avtoturargohda joy yo‘qligi sabab mashinalar trassa bo‘yiga qator qilib qo‘yilmoqda. Chegara yaqinidagi tumanda o‘zbek, tojik, rus, qirg‘iz, turk avtomobil raqamlariga ega “furalar”ni ko‘rish mumkin.
Biroq “imtiyozga ega” yuk mashinalari ham mavjud. Haydovchining so‘zlariga ko‘ra, Tashkent City loyihasi uchun qurilish materillari olib ketayotgan yuk mashinalari va “sementovoz”lar chegaradan tezda o‘tib ketmoqda. Qolganlar esa tibbiyot xodimlari natijasini qachon berishlarini kutishga majbur. Tojikistonga qaytib ketishni istagan ayrim haydovchilar ham COVID-19 “spravkasi”siz ortga qo‘yilmagan.
Nashr manbasining so‘zlariga ko‘ra, u nazorat-o‘tkazish punktiga 10-iyul kuni kelgan va kechasi koronavirusga test topshirgan. Tahlil natijalari hamon yo‘q. Sanitariya-epidemiologik xizmati xodimlariga murojaat qilingan, biroq ular javoblar qachon chiqishi haqida hech narsa demagan.
Haydovchining qo‘shimcha qilishicha, uch kun davomida tibbiyot xodimlaridan hech qanday darak bo‘lmagan va faqat bugun 4-5 kun oldin test topshirganlarning 30 tasini natijasini olib kelgan. Ular orasida koronavirus qayd etilganlar ham bor. “Biz niqobdamiz, oraliq masofaga rioya qilishga urinyapmiz. Ammo baribir mashinalar to‘plangach, haydovchilar muloqotda bo‘ladi, bir-biri bilan gaplashadi. Kasallik yuqtirib olishdan xavotirdamiz”, — deydi haydovchi.
Uning aytishicha, barcha chegaralarda karantin zonalari mavjud. Biroq avvallari tahlil natijalari 12 soat yoki uzog‘i bilan bir sutkada tayyor bo‘lgan. Iyul oyidan boshlab esa vaziyat o‘zgargan va natijalar juda sekin kelmoqda.
Eslatib o‘tamiz, mart oyida Eron—Turkmaniston chegarasida qolib ketgan 11 o‘zbekistonlik yuk mashina haydovchisi Shavkat Mirziyoyevdan yordam so‘ragan edi. Shundan so‘ng, Prezident ularni O‘zbekistonga qaytarish bo‘yicha alohida ko‘rsatma bergandi.
Izoh (0)