Tojikistonda koronavirus tarqatganlik uchun 5 yilgacha ozodlikdan mahrum etish jazosi joriy qilindi

Tojikiston prezidenti Emomali Rahmon 4-iyul kuni mamlakat Jinoyat kodeksiga kiritilgan o‘zgartirishni ma’qulladi. Bu haqda Asia-Plus xabar berdi.

Jinoyat kodeksiga kiritilgan o‘zgartirishga ko‘ra, mamlakatda infeksion kasalliklarni, jumladan, koronavirus infeksiyasini tarqatganlik uchun jinoiy javobgarlik joriy qlinmoqda.

Mazkur o‘zgarishlarda belgilangan qoidalarni buzganlar ikki yildan besh yilgacha ozodlikdan mahrum etilishi mumkin, agar mazkur qilmish salomatlik uchun jiddiy zarar keltirsa, besh yildan o‘n yilgacha ozodlikdan mahrum qilish jazosi qo‘llanilishi mumkin.

Infeksion kasalliklarni tarqatganlik uchun jazo Tojikiston Jinoyat kodeksining 207-moddasida belgilangandi. Ma’qullangan o‘zgarishlar esa mazkur moddani to‘ldirdi.

Mazkur moddaga (Ehtiyotsizlik sababli odamlarning kasallanishi yoki zaharlanishiga olib kelgan sanitariya-gigiyena va virusga qarshi me’yorlar va qoidalarning buzilishi) ko‘ra, avval yirik miqdordagi jarima, axloq tuzatish ishlari yoki ikki yilgacha ozodlikdan mahrum etish ko‘zda tutilgandi.

Kiritilgan o‘zgartirishga ko‘ra, odam salomatligi uchun xavfli bo‘lgan kasallikning yuzaga kelishi va tarqalishi sharoitida mazkur moddada ko‘rsatilgan huquqbuzarlikni sodir etish besh yilgacha ozodlikdan mahrum qilish jazosiga sabab bo‘lishi mumkin. Agar mazkur qilmish odam o‘limiga olib kelsa, jazo muddati besh yildan o‘n yilgacha uzayishi mumkin.

Shuningdek, 4-iyul kuni Emomali Rahmon niqob taqmaganlik va pandemiya haqida yolg‘on ma’lumot tarqatgalik uchun jarima joriy qilishni ham ma’qullagan.

Unga ko‘ra, OAV orqali pandemiya haqida yolg‘on ma’lumot tarqatish jismoniy shaxslarni 580 somon (553 ming so‘m), yuridik shaxslarni 11 600 somon (11,4 million so‘m)gacha jarimaga tortishga sabab bo‘ladi. Jamoat joylarida niqob taqmaganlar esa 116 somondan 290 somongacha (114-286 ming so‘m) jarimaga tortilishi mumkin.

Eslatib o‘tamiz, may oyida Samarqandda 34 kishiga koronavirus yuqtirgan tibbiyot xodimiga nisbatan jinoyat ishi qo‘zg‘atilgandi. Shundan so‘ng Sog‘liqni saqlash vazirligi Bosh prokuraturaga murojaat yo‘llab, mazkur qarorning bekor qilinishini so‘ragandi.

Ma’lumot uchun, O‘zbekiston Prezidenti Shavkat Mirziyoyev 2020-yilning mart oyida epidemiyaga qarshi kurash qoidalarini buzganda javobgarlik kuchayishi to‘g‘risidagi qonunni imzolagan. Qonunga ko‘ra, karantin qoidalarini buzganlik uchun jazo kuchaytirildi va jarimalar miqdori bir necha barobar oshirildi. Yuqumli kasallik haqida yolg‘on ma’lumot tarqatganlik uchun jinoiy javobgarlik joriy etildi.