Тожикистон президенти Эмомали Раҳмон 4 июль куни мамлакат Жиноят кодексига киритилган ўзгартиришни маъқуллади. Бу ҳақда Asia-Plus хабар берди.
Жиноят кодексига киритилган ўзгартиришга кўра, мамлакатда инфекцион касалликларни, жумладан, коронавирус инфекциясини тарқатганлик учун жиноий жавобгарлик жорий қлинмоқда.
Мазкур ўзгаришларда белгиланган қоидаларни бузганлар икки йилдан беш йилгача озодликдан маҳрум этилиши мумкин, агар мазкур қилмиш саломатлик учун жиддий зарар келтирса, беш йилдан ўн йилгача озодликдан маҳрум қилиш жазоси қўлланилиши мумкин.
Инфекцион касалликларни тарқатганлик учун жазо Тожикистон Жиноят кодексининг 207-моддасида белгиланганди. Маъқулланган ўзгаришлар эса мазкур моддани тўлдирди.
Мазкур моддага (Эҳтиётсизлик сабабли одамларнинг касалланиши ёки заҳарланишига олиб келган санитария-гигиена ва вирусга қарши меъёрлар ва қоидаларнинг бузилиши) кўра, аввал йирик миқдордаги жарима, ахлоқ тузатиш ишлари ёки икки йилгача озодликдан маҳрум этиш кўзда тутилганди.
Киритилган ўзгартиришга кўра, одам саломатлиги учун хавфли бўлган касалликнинг юзага келиши ва тарқалиши шароитида мазкур моддада кўрсатилган ҳуқуқбузарликни содир этиш беш йилгача озодликдан маҳрум қилиш жазосига сабаб бўлиши мумкин. Агар мазкур қилмиш одам ўлимига олиб келса, жазо муддати беш йилдан ўн йилгача узайиши мумкин.
Шунингдек, 4 июль куни Эмомали Раҳмон ниқоб тақмаганлик ва пандемия ҳақида ёлғон маълумот тарқатгалик учун жарима жорий қилишни ҳам маъқуллаган.
Унга кўра, ОАВ орқали пандемия ҳақида ёлғон маълумот тарқатиш жисмоний шахсларни 580 сомон (553 минг сўм), юридик шахсларни 11 600 сомон (11,4 миллион сўм)гача жаримага тортишга сабаб бўлади. Жамоат жойларида ниқоб тақмаганлар эса 116 сомондан 290 сомонгача (114-286 минг сўм) жаримага тортилиши мумкин.
Эслатиб ўтамиз, май ойида Самарқандда 34 кишига коронавирус юқтирган тиббиёт ходимига нисбатан жиноят иши қўзғатилганди. Шундан сўнг Соғлиқни сақлаш вазирлиги Бош прокуратурага мурожаат йўллаб, мазкур қарорнинг бекор қилинишини сўраганди.
Маълумот учун, Ўзбекистон Президенти Шавкат Мирзиёев 2020 йилнинг март ойида эпидемияга қарши кураш қоидаларини бузганда жавобгарлик кучайиши тўғрисидаги қонунни имзолаган. Қонунга кўра, карантин қоидаларини бузганлик учун жазо кучайтирилди ва жарималар миқдори бир неча баробар оширилди. Юқумли касаллик ҳақида ёлғон маълумот тарқатганлик учун жиноий жавобгарлик жорий этилди.
Изоҳ (0)