Fransiya prezidenti Emmanuel Makron 3-iyul, juma kuni Jan Kasteksni mamlakat bosh vaziri lavozimiga tayinladi. Bu haqda “Interfaks” xabar berdi. Avvalroq shu paytgacha mamlakat bosh vaziri sifatida ishlab kelgan Eduar Filippning iste’foga chiqqani haqida xabar berilgandi.
Kasteks oliy martabali fransuz mansabdori bo‘lib, unga mamlakatni koronavirus pandemiyasi sababli joriy qilingan izolyatsiya rejimidan chiqarish jarayonini muvofiqlashtirish topshirilgandi.
Le Figaro gazetasi Kasteksni mamlakatning sobiq prezidenti Nikolya Sarkozining tarafdori deb atagan va uning epidemiologik cheklovlarni olib tashlash bo‘yicha muvaffaqiyatli boshqaruvini ta’kidlab o‘tgan.
Qayd etilishicha, 55 yoshli Jan Kasteks o‘zining Fransiya Hisob palatasidagi ishi bilan tanilgan. 15-martda bo‘lib o‘tgan munitsipial saylovlarning birinchi turida u Sharqiy Pireney departamentidagi Prad shahri meri sifatida ishonchli g‘alabaga erishgan.
Izoh (0)