Fransiya bosh vaziri Eduard Filipp iste’foga chiqdi, deb xabar bermoqda Reuters. U yangi hukumat tayinlanguniga qadar vazifasini bajarishda davom etadi.
Eduard Fransiya hukumatiga 2017-yilning 15-mayidan buyon rahbarlik qilib kelayotgan edi. Qayd etilishicha, uning o‘zi iste’foga chiqishga qaror qilgan, Fransiya prezidenti Emmanuel Makron uning iste’fosini qabul qilgan.
Filippning iste’fosi Makronning “Olg‘a, Respublika!” partiyasining 28-iyun kuni bo‘lib o‘tgan hududiy saylovlarda muvaffaqiyatsiz natijasi fonida yuz berdi.
Prezident partiyasi yetakchi lavozimlarni egallay olmagan, yagona katta muvaffaqiyat Gavr meri lavozimini saqlab qolishga muvaffaq bo‘lgan aynan Eduard Filipp bilan bog‘liq. Fransiya konstitutsiyasiga ko‘ra, Filipp mer lavozimiga nomzodni taklif qilishi, o‘zi esa hukumat rahbari sifatida ishlashda davom etishi mumkin edi.
Politico’ning yozishicha, Makron Filippni bosh vazir lavozimidan olib tashlamoqchi bo‘lgan, ammo uning Gavrdagi g‘alabasi vaziyatni murakkablashtirgan. Iyun oyida o‘tkazilgan so‘rovnomaga ko‘ra, fransiyaliklarning 43 foizi Filippning bosh vazir lavozimida faoliyatini davom ettirishi tarafdori, 33 foizi esa uning iste’foga chiqishini xohlaydi.
Qayd etilishicha, Fransiya prezidenti apparati “yangi bosh vazir yaqin soatlarda tayinlanishi”ni ma’lum qilgan. Shu bilan birga, Le Mond’ning yozishicha, Makron Filippni ushbu lavozimga qayta tayinlanishiga hech narsa to‘sqinlik qilmaydi, biroq Reuters’ning aniqlashtirishicha, uni qayta tayinlash masalasi ko‘rib chiqilmayapti.
Izoh (0)