O‘zbekistonda tadbirkorlar tomonidan soliqlar bo‘yicha qonunda belgilanmagan avans to‘lovlarini amalga oshirishni taqiqlash rejalashtirilmoqda. Bu Prezidentning “Toshkent shahrini kompleks ijtimoiy-iqtisodiy rivojlantirish hamda tadbirkorlik va innovatsion faoliyatni qo‘llab-quvvatlash bo‘yicha qo‘shimcha chora-tadbirlar to‘g‘risida”gi qarori loyihasida ko‘zda tutilgan.
Qaror loyihasiga ko‘ra, Bosh prokuratura Prezident huzuridagi Tadbirkorlik subyektlarining huquqlari va qonuniy manfaatlarini himoya qilish bo‘yicha vakil bilan birgalikda tadbirkorlik subyektlarining hisoblaridan davlat hokimiyati organlari tomonidan pul mablag‘larining asoslanmagan yechib olinishiga nisbatan murojaatlarni sudgacha tartibga solishning tezlashtirilgan mexanizmini tatbiq qiladi.
Inkasso topshiriqnomasi tashabbuskoriga bazaviy hisoblash miqdorining 200 baravari miqdorida jarima solish yo‘li bilan tadbirkorlik subyektlari hisoblaridan pul mablag‘larini noqonuniy bloklash yoki yechib olishga yo‘l qo‘ygan mansabdor shaxslar uchun javobgarlikning qat’iy choralari belgilash rejalashtirilmoqda.
Hujjatda qayd etilishicha, amaldagi qonunchilik bilan belgilangan holatlardan tashqari tadbirkorlik subyektlariga soliqlar bo‘yicha avans to‘lovlarini amalga oshirish taqiqlanadi.
Noqonuniy avans undirish natijasida undiriladigan jarimalardan kelib tushadigan mablag‘lar davlat hokimiyati organlarining noqonuniy harakatlari tufayli faoliyatiga zarar yetkazilgan tadbirkorlik subyektlarining hisoblariga yo‘naltiriladi.
Izoh (0)