Ўзбекистонда тадбиркорлар томонидан солиқлар бўйича қонунда белгиланмаган аванс тўловларини амалга оширишни тақиқлаш режалаштирилмоқда. Бу Президентнинг «Тошкент шаҳрини комплекс ижтимоий-иқтисодий ривожлантириш ҳамда тадбиркорлик ва инновацион фаолиятни қўллаб-қувватлаш бўйича қўшимча чора-тадбирлар тўғрисида»ги қарори лойиҳасида кўзда тутилган.
Қарор лойиҳасига кўра, Бош прокуратура Президент ҳузуридаги Тадбиркорлик субъектларининг ҳуқуқлари ва қонуний манфаатларини ҳимоя қилиш бўйича вакил билан биргаликда тадбиркорлик субъектларининг ҳисобларидан давлат ҳокимияти органлари томонидан пул маблағларининг асосланмаган ечиб олинишига нисбатан мурожаатларни судгача тартибга солишнинг тезлаштирилган механизмини татбиқ қилади.
Инкассо топшириқномаси ташаббускорига базавий ҳисоблаш миқдорининг 200 баравари миқдорида жарима солиш йўли билан тадбиркорлик субъектлари ҳисобларидан пул маблағларини ноқонуний блоклаш ёки ечиб олишга йўл қўйган мансабдор шахслар учун жавобгарликнинг қатъий чоралари белгилаш режалаштирилмоқда.
Ҳужжатда қайд этилишича, амалдаги қонунчилик билан белгиланган ҳолатлардан ташқари тадбиркорлик субъектларига солиқлар бўйича аванс тўловларини амалга ошириш тақиқланади.
Ноқонуний аванс ундириш натижасида ундириладиган жарималардан келиб тушадиган маблағлар давлат ҳокимияти органларининг ноқонуний ҳаракатлари туфайли фаолиятига зарар етказилган тадбиркорлик субъектларининг ҳисобларига йўналтирилади.
Изоҳ (0)