Shuhrat G‘aniyev: Viloyat hokimidan boshlab barcha fuqarolar karantin qoidalariga amal qilishi shart

Farg‘ona viloyati hokimi Shuhrat G‘aniyevning fikricha, pandemiya davrida mutaxassislar tavsiyalariga amal qilib, iqtisodiy inqirozni chetlab o‘tish mumkin. U bu haqda jurnalistlar bilan bo‘lib o‘tgan ochiq muloqotda aytib o‘tgan, deya xabar bermoqda “Daryo” muxbiri Musulmonbek Ibrohimov.

“Barcha fuqarolar karantin qoidalariga amal qilishi shart, bu jarayon viloyat hokimidan boshlanishi lozim. Koronavirus ‘odamlar gapiga quloq solmaydigan’ kasallik bo‘lib chiqdi. Men o‘ylaymanki, eng katta davo shifokorlar, mutaxassislar bergan tavsiyalar asosida O‘zbekiston hukumati tomonidan qabul qilingan muhim hujjatlarga e’tibor berib, o‘sha hujjatlarni sinchiklab o‘qib, amal qilishdir. Hech kim himoyalangan emas. Avvalo, inson o‘zini o‘zi, oilasini, jamiyatni himoya qilishi uchun mutaxassis aytgan tavsiyalarga amal qilishi kerak”, — dedi Farg‘ona viloyati hokimi.

Shifokorlar bergan tavsiyalarga amal qilish pandemiya sharoitida iqtisodiy inqirozga duch kelinmasligiga ham xizmat qiladi.

“Karantin sharoitida yashashni, ishlashni o‘rganib olsak bo‘ldi. Bu bo‘yicha har kuni o‘z ustimizda izlanyapmiz”, — degan Shuhrat G‘aniyev.