Ta’lim sifatini nazorat qilish davlat inspeksiyasi tomonidan Qirg‘iziston va Tojikistondagi OTMga salbiy baho berilganiga e’tiroz bildirildi

Oliy Majlis Senati Xalqaro munosabatlar, tashqi iqtisodiy aloqalar, xorijiy investitsiyalar va turizm masalalari qo‘mitasi raisi Ravshanbek Alimov Ta’lim sifatini nazorat qilish davlat inspeksiyasining tomonidan e’lon qilingan material yuzasidan e’tirozlari bilan bo‘lishdi.

18-iyun kuni Vazirlar Mahkamasi huzuridagi Ta’lim sifatini nazorat qilish davlat inspeksiyasining rasmiy veb-saytida “Qo‘shni davlatlardagi oliy ta’lim tashkilotlarining ta’lim sifati darajasini aniqlash bo‘yicha tavsiya” sarlavhasi ostida material e’lon qilingan. Material O‘zbekistonda va yaqin qo‘shni davlatlar ommaviy axborot vositalari hamda ijtimoiy tarmoqlarda keng muhokamalarga sabab bo‘lgan.

Unda O‘zbekiston hukumat idorasi nostrifikatsiya bilan bog‘liq jarayonni tahlildan o‘tkazib, qo‘shni Qirg‘iziston va Tojikiston davlatlarining qator oliy ta’lim muassasalariga salbiy baho berib, fuqarolarga tegishli tavsiyalarini e’lon qilgan.

“Tavsiya matni bilan yaqindan tanishganimizda, undagi ba’zi fikr va xulosalar o‘rinli e’tiroz va savollarni tug‘dirmoqda”, — deyiladi xabarda.

Birinchidan, Inspeksiya aniq va asoslangan mezonlar o‘rniga “O‘zbekiston mehnat bozori talab darajasiga mos emas”, degan umumiy jumla bilan chegaralanib qolgan. Bunday xulosa chiqarish uchun, eng avvalo, o‘sha mehnat bozori parametrlari qani? Ularni kim belgilagan? Qo‘shni davlatlarning OTMlari qachon va kim tomonidan tekshirilgan?

Ikkinchidan, e’lon qilingan tavsiyada “... sifatli ta’lim arzon bo‘lmas” va “qo‘shni mamlakatlardagi aksariyat OTM tomonidan taklif etilayotgan to‘lov-kontrakt narxi sifatli ta’lim berish imkoniyatini bermaydi”, deb ta’kidlangan. Nimaga? Bu qanday qonuniyat bo‘ldi? Balki biz avval O‘zbekiston OTMlarining kontrakt narxlariga va shu narxlarga bizda berilayotgan ta’lim sifatiga xolisona boqarmiz?

Menimcha, bu yerda ko‘proq raqobat va mamlakatimiz oliy ta’lim muassasalarining raqobatbardoshlik darajasi haqida so‘z yuritsak adolatdan bo‘ladi.

Uchinchidan, mamlakatimiz hukumat Inspeksiyasining xorijiy davlatlar OTMlariga bunday baho berishga huquqi bormi? Bu harakatlarning maqsadi, ularning davlatimiz milliy manfaatlari va tashqi siyosatdagi intilishlariga qanchalik to‘g‘ri keladi?

Ravshanbek Alimov, Xalqaro munosabatlar, tashqi iqtisodiy aloqalar, xorijiy investitsiyalar va turizm masalalari qo‘mitasi raisi