Qashqadaryo viloyati Qarshi shahridagi yuk ko‘taruvchi konstruksiyalari qulab tushgan Nasaf Travel kompaniyasiga tegishli binoning qurilishi noqonuniy olib borilgan. Bu haqda Qurilish vazirligi ma’lum qildi.
Vazirlik tomonidan ta’kidlanishicha, Qashqadaryo viloyat Qurilish sohasida hududiy nazorat inspeksiyasi tomonidan o‘rganish ishlari o‘tkazilgan. Aniqlanishicha, Nasaf Travel kompaniyasiga tegishli ushbu obyektdagi qurilish ishlari ro‘yxatga olinmagan holda noqonuniy olib borilgan. Nasaf Travel kompaniyasi inspeksiyani qurilish ishlari haqida belgilangan tartibga muvofiq xabardor etmagan.
“Inspeksiya tomonidan ushbu obyekt qurilishi bo‘yicha buyurtmachi Nasaf Travel kompaniyasi bir necha bor ogohlantirilgan bo‘lishiga qaramasdan, noqonuniy ravishda obyektda qurilish-montaj ishlarini davom ettirgan. Qurilish me’yorlarining qo‘pol ravishda buzilishi natijasida mazkur holat kelib chiqqan. Tadbirkorlik subyekti qonunda ko‘rsatilgan erkinliklarni suiiste’mol qilgan. Noqonuniy qurilish ishlarini amalga oshirgan”, — deyiladi vazirlik xabarida.
Eslatib o‘tamiz, 23-iyun kuni soat 21:30 da Qarshi shahri Islom Karimov ko‘chasi Nasaf Travel mehmonxonasi binosining chap tomonidan qo‘shimcha qurilayotgan 5 qavatli binoning yuk ko‘taruvchi temir-beton konstruksiyalari qulab tushgan. Buning oqibatida bir nafar ishchi-xodim voqea joyida vafot etgan. FVV qutqaruvchilari vayronalar ostidan 4 nafar fuqaroni qutqarishga muvaffaq bo‘lgan.
Ma’lumot uchun, Toshkent metrosidagi “Yunusobod” yo‘lining ikkita yangi bekatini qurish ishlari chog‘ida 2019-yilning 18-dekabr kuni tuproq o‘pirilib tushishi oqibatida olti nafar ishchi halok bo‘lgandi.
Izoh (0)