Олий Мажлис Сенати Халқаро муносабатлар, ташқи иқтисодий алоқалар, хорижий инвестициялар ва туризм масалалари қўмитаси раиси Равшанбек Алимов Таълим сифатини назорат қилиш давлат инспекциясининг томонидан эълон қилинган материал юзасидан эътирозлари билан бўлишди.
18 июнь куни Вазирлар Маҳкамаси ҳузуридаги Таълим сифатини назорат қилиш давлат инспекциясининг расмий веб-сайтида «Қўшни давлатлардаги олий таълим ташкилотларининг таълим сифати даражасини аниқлаш бўйича тавсия» сарлавҳаси остида материал эълон қилинган. Материал Ўзбекистонда ва яқин қўшни давлатлар оммавий ахборот воситалари ҳамда ижтимоий тармоқларда кенг муҳокамаларга сабаб бўлган.
Унда Ўзбекистон ҳукумат идораси нострификация билан боғлиқ жараённи таҳлилдан ўтказиб, қўшни Қирғизистон ва Тожикистон давлатларининг қатор олий таълим муассасаларига салбий баҳо бериб, фуқароларга тегишли тавсияларини эълон қилган.
«Тавсия матни билан яқиндан танишганимизда, ундаги баъзи фикр ва хулосалар ўринли эътироз ва саволларни туғдирмоқда», — дейилади хабарда.
Биринчидан, Инспекция аниқ ва асосланган мезонлар ўрнига «Ўзбекистон меҳнат бозори талаб даражасига мос эмас», деган умумий жумла билан чегараланиб қолган. Бундай хулоса чиқариш учун, энг аввало, ўша меҳнат бозори параметрлари қани? Уларни ким белгилаган? Қўшни давлатларнинг ОТМлари қачон ва ким томонидан текширилган?Таъкидланишича, қўмитанинг тегишли сўровномаси Инспекцияга юборилган ва расмий жавобни кутилмоқда.Иккинчидан, эълон қилинган тавсияда «... сифатли таълим арзон бўлмас» ва «қўшни мамлакатлардаги аксарият ОТМ томонидан таклиф этилаётган тўлов-контракт нархи сифатли таълим бериш имкониятини бермайди», деб таъкидланган. Нимага? Бу қандай қонуният бўлди? Балки биз аввал Ўзбекистон ОТМларининг контракт нархларига ва шу нархларга бизда берилаётган таълим сифатига холисона боқармиз?
Менимча, бу ерда кўпроқ рақобат ва мамлакатимиз олий таълим муассасаларининг рақобатбардошлик даражаси ҳақида сўз юритсак адолатдан бўлади.
Учинчидан, мамлакатимиз ҳукумат Инспекциясининг хорижий давлатлар ОТМларига бундай баҳо беришга ҳуқуқи борми? Бу ҳаракатларнинг мақсади, уларнинг давлатимиз миллий манфаатлари ва ташқи сиёсатдаги интилишларига қанчалик тўғри келади?
Равшанбек Алимов, Халқаро муносабатлар, ташқи иқтисодий алоқалар, хорижий инвестициялар ва туризм масалалари қўмитаси раиси
Изоҳ (0)