Futbol bo‘yicha Сoсa Сola Superliga 6-turidan o‘rin olgan markaziy uchrashuvda “Bunyodkor” 25-iyun, payshanba kuni Toshkentning boshqa bir klubi “Lokomotiv”ni qabul qildi.
Derbi maqomida o‘tgan bellashuvning dastlabki 45 daqiqaligida “qaldirg‘ochlar” nisbatan iliqroq taassurot qoldirdi. Buning misoli o‘laroq, “Bunyodkor”ning turkmanistonlik legioneri Selim Nurmurodov 19-daqiqada chamasi 22 metrlardan yo‘llagan ajoyib zarbasi bilan Ignatiy Nesterov dog‘da qoldirdi — 1:0. Ikkinchi bo‘limda ham mezbonlar ustunlikni o‘z tomonlarida ushlab turdi va 74-daqiqaga kelib, Shahboz Erkinov chap qanotdan oshirilgan to‘pni darvozaga to‘g‘irilab qo‘ydi — 2:0. Shundan so‘ng darvozalar boshqa ishg‘ol etilmadi va “Bunyodkor” o‘z maydonida “Lokomotiv” ustidan ishonchli g‘alabaga erishdi.
“Bunyodkor” ushbu g‘alabadan keyin ochkolarini 12 taga yetkazib olgan bo‘lsa, “Lokomotiv” 6 ochko bilan 10-o‘rinda bormoqda.
“Paxtakor” esa ushbu turda “Qizilqum” mehmoni bo‘ldi va ishonchli g‘alabani qo‘lga kiritdi. Uchrashuvning dastlabki bo‘limida hisob ochilmadi. Ikkinchi bo‘lim debyutida Doston Hamdamov “sherlar”ni oldinga olib chiqdi. 74-daqiqada Jaloliddin Masharipovning burchakdan uzatib bergan to‘pini Eren Derdiyok boshi bilan darvozaga joylab qo‘ydi.
Mazkur g‘alabadan so‘ng ochkolarini 15 taga yetkazib olgan “Paxtakor” birinchi o‘ringa qaytdi. “Qizilqum” (1) esa 13-pog‘onada bormoqda.
Сoсa Сola Supreliga
6-tur bahsi
25-iyun, payshanba
“Bunyodkor” — “Lokomotiv” 2:0
Gollar: 1:0 – 19 Nurmurodov, 2:0 – 74 Erkinov.“Bunyodkor”: Sarvar Karimov, Islom Qobilov, Ibrohimxalil Yo‘ldoshev, Jasur Jaloliddinov (Farruh Ikramov, 58), Rasul Yo‘ldoshev (Anvar G‘ofurov, 76), Lutfulla To‘rayev, Sanjar Qodirqulov, Nurillo To‘xtasinov, Abdulla Abdullayev, Selim Nurmurodov (Suhrob Izzatov,), Shahboz Erkinov (Humoyun Murtazoyev, 76).
“Lokomotiv”: Ignatiy Nesterov, Shahzod Shaymanov, Davron Umirov (Kamron Saidazimov, 66), Kaxi Maxaradze (Oybek Qilichev, 79), Vadim Afonin, Kirill Pogrebnyak (Ibrohim G‘anixonov, 66),Temurxo‘ja Abduxoliqov, Davron Hoshimov, Dilshod Komilov (Farruh Ibrohimov, 70), Shuhrat Muhammadiyev (Javohir Alijonov, 79), Sherzod Fayziyev.
Ogohlantirishlar: Qodirqulov (39), Hoshimov (45), Qobilov (45+1).
“Qizilqum” — “Paxtakor” 0:2
Gollar: 0:1 – 47 Hamdamov, 0:2 – 74 Derdiyok.“Qizilqum”: Artyom Makosin, Ruslan Margiyev, Alisher Sanoyev, Qadamboy Nurmetov, Fayzullo Qambarov, Salim Mustafoyev, Sherali Jo‘rayev, Aziz Usmonov, Makkartni Naveseb, Oleg Tolmasov, Sunnatilla Abdullajonov.
“Paxtakor”: Eldorbek Suyunov, Hojiakbar Alijonov, Anzur Ismoilov, Jaloliddin Masharipov, Dragan Cheran, Dostonbek Hamdamov (Javohir Sidiqov, 83), Odiljon Hamrobekov, Sherzod A’zamov, Sardor Sobirxo‘jayev (Abror Ismoilov, 83), Farruh Sayfiyev (Akrom Komilov, 90), Eren Derdiyok (Igor Sergeyev, 83).
Ogohlantirish: Jo‘rayev (42).
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)