Frenk Lempard Xosep Gvardiolaga qarshi. “Chelsi”—“Manchester Siti” uchrashuvi haqida

Angliya Premyer Ligasi 31-turining markaziy uchrashuvida 25-iyun, payshanba kuni “Manchester Siti” va “Chelsi” jamoalari o‘zaro kuch sinashadi. Frenk Lempard shogirdlari o‘z maydonida Xosep Gvardiola boshchiligidagi jamoani qabul qilib, kim kuchliroq ekaniga aniqlik kiritishga harakat qilib ko‘radi.

Mazkur uchrashuv oldidan “Manchester Siti”ning kayfiyati a’lo darajada. Boisi jamoa restartni ajoyib tarzda boshladi. Pep Gvardiola shogirdlari tanaffusdan keyin “Arsenal” (3:0) va “Byornli”ni (5:0) yanchib tashladi. Ushbu natijalarni qoyilmaqom deb baholash ham mumkin, chunki “shaharliklar” so‘nggi o‘yinini 8-mart sanasida o‘tkazgandi. Bu yerda murabbiylar shtabining katta hajmdagi ishni amalga oshirganini ta’kidlab o‘tish darkor. Agar ushbu tendensiya davom etadigan bo‘lsa, “Manchester Siti” Chempionlar Ligasi 2019/20-yilgi mavsumida g‘alaba qozonish uchun asosiy favoritlardan biriga aylanishi, shubhasiz.

“Chelsi” haqida gap ketganda esa, Frenk Lempard jamoasi bitta o‘yin o‘tkazib, unda g‘alabani qo‘lga kiritdi. Jamoa “Aston Villa” maydoniga safar qilib, 2:1 hisobida g‘alaba bilan ortga qaytdi. Bellashuvda dastlab “ko‘klar” imkoniyatni boy berayotgandi, biroq ikkinchi bo‘limda jamoa ikki daqiqada ichida ikkita gol urdi. Va bu uch ochkoni qo‘lga kiritish uchun yetarli bo‘ldi.

Gvardiola “Chelsi”ga qarshi o‘yinda “Arsenal” va “Byornli”ga qarshi harakat qilgan tarkibga biroz o‘zgartirish kiritishi mumkinligini istisno qilmadi. Ispaniyalik mutaxassis e’tiborning katta qismini Angliya Kubogiga (“Nyukasl” bilan o‘yinga) qaratmoqchi. Gvardiola uchun bu o‘yin finalga teng.

O‘yinning ahamiyatini oshirib beradigan yana bir jihat shundaki, agar “Chelsi” “Manchester Siti”dan ochko oladigan bo‘lsa, “Liverpul” 31-turning o‘zidayoq chempionlikni tantana qilishi mumkin. London klubining mag‘lubiyatdan boshqa har qanday natijasi “Liverpul”ga 30 yil kutilgan chempionlikni taqdim etadi.

Mazkur o‘yinda “Chelsi”ga Fikayo Tomori (jarohat) va Kallum Hadson-Odoi (sport formasida emas) yordam bera olmasa, “Manchester Siti”da Serxio Aguero jarohati tufayli maydonga tusha olmaydi.

Eslatib o‘tamiz, tomonlarning birinchi davradagi uchrashuvida “Manchester Siti” 2:1 hisobida g‘alaba qozongan.

O‘yinga oid qiziq faktlar:

• “Manchester Siti” Angliya Premyer Ligasida o‘tkazilgan so‘nggi 7 o‘yinning oxirgi 5 tasida birorta ham gol o‘tkazib yubormagan
• “Chelsi” Angliya chempionatidagi 7 uchrashuvning 6 tasida kamida 2 tadan gol urgan.
• Premyer Liganing boshqa birorta jamoasi “Manchester Siti”ni “Chelsi” kabi ko‘p marta mag‘lubiyatga uchratmagan (25)
• Ushbu uchrashuv “Manchester Siti” va “Chelsi” o‘rtasidagi payshanba kuni bo‘lib o‘tayotgan ikkinchi bahs hisoblanadi (ichki chempionat doirasida jamoalar jami 150 o‘yin o‘tkazgan) Birinchi o‘yin 1935-yilda “Chelsi”ning g‘alabasi (2:1) yakunlangan.

• 162 ta uchrashuv
• “Chelsi”da — 65 ta g‘alaba
• “Manchester Siti”da — 57 ta g‘alaba
• 40 ta durang
• “Chelsi” — 221 ta gol urgan
• “Manchester Siti” — 208 ta gol urgan
• “Chelsi”ning eng yirik g‘alabasi — 6:0
• “Manchester Siti”ning eng yirik g‘alabasi: 6:0
• Eng sermahsul o‘yinlar: 6:3, 4:5
• Eng sermahsul durang: 4:4

Bizning qiladigan ishlarimiz bor. Vazifamiz — so‘nggi bir necha mavsumda dunyoning eng yaxshi klublaridan biri bo‘lib turgan jamoa bilan kurashish va ijobiy natijaga erishishga harakat qilishdir.Frenk Lempard “Chelsi” ustozi

Tarkibimiz futbolchilarning maydonda qancha vaqt o‘tkazganiga va ularning jismoniy holatiga bog‘liq. Biz “Chelsi” bilan bo‘ladigan uchrashuvdan oldinroqqa qarayapmiz. Jamoamiz hali ham har uch kunda 90 daqiqadan o‘ynashga tayyor emas.

Xosep Gvardiola “Manchester Siti” bosh murabbiyi