Qo‘l mehnati asosida toza ipakdan to‘qilgan Marg‘ilon gilamlarining bir metri kamida 25 ming dollarga sotilmoqda. Bu haqda Farg‘ona viloyati hokimligi tomonidan jurnalist va blogerlar uchun tashkil etilgan media-turda ma’lum qilindi, deya xabar berdi “Daryo” muxbiri Azizjon Ermatov.
Qayd etilishicha, Marg‘ilon shahrida davlat-xususiy sheriklik asosida qurilgan Hunarmandchilik markazida 200 dan ortiq turdagi atlas va adras to‘qish, gilamchilik, tikuvchilik, hunarmandchilik mahsulotlari ishlab chiqarish yo‘lga qo‘yilgan.
Ikki qavatli markazning quyi qavatida atlas, adras, shoyi, baxmal, beqasam matolar to‘qiladi. Birinchi qavatdan tayyor mahsulotlar ko‘rgazmasi, podium, chevarxona o‘rin olgan. Bu yerdagi do‘konda matoga gul chizish, bog‘lash, davra, qad tayyorlash jarayonlari ko‘rgazmali tarzda namoyish etiladi. Binoning yuqori qavatida gilam sexi joylashgan. Bu yerda barcha mahsulotlar to‘liq qo‘l mehnati yordamida 100 foiz toza ipakdan to‘qiladi.
“Ismoiljon gilamlari” korxonasiga qarashli ustaxonalarda asl ipakka tabiiy bo‘yoqlardan gul chizib mato to‘qiladi. Bu matolardan to‘qilgan gilamlar Turkiyaga, atlas va adras matolar esa AQSh, Italiya, Fransiya, Rossiya kabi mamlakatlarga eksport qilinadi.
Korxona rahbari Ibrohim Sultonovning ma’lum qilishicha, korxonada to‘qilgan 3,5-4 metr hajmdagi gilam 61 ming dollarga sotilgan. Kichik hajmdagi bitta gilamni to‘qish uchun olti oydan bir yilgacha vaqt ketadi. Gilamning hajmi, ipak va ranglarining sifati, tugunlari soniga qarab unga narx belgilanadi. Eng arzon gilamning bahosi 25 ming dollardan boshlanadi.
Eslatib o‘tamiz, avvalroq Marg‘ilon shahrida Hunarmandlar bozori hamda Hunarmandchilik markazi foydalanishga topshirilgani haqida xabar berilgandi.
Izoh (0)