Butunjahon turizm tashkiloti yig‘ilishiga Samarqand shahri mezbonlik qildi

Birlashgan Millatlar Tashkiloti (BMT)ning Butunjahon turizm tashkiloti (UNWTO) Yevropa mintaqaviy komissiyasining 65-yig‘ilishiga Samarqand shahri mezbonlik qildi. Tadbir bosh vazir o‘rinbosari, Turizmni rivojlantirish davlat qo‘mitasi raisi Aziz Abduhakimov boshchiligida o‘tdi. Bu haqda “Daryo” muxbiri Farhod Norbo‘tayev xabar berdi.

Koronavirus pandemiyasi sabab onlayn videokonferensiya shaklida o‘tgan tadbirda 40 dan ortiq davlatning turizm va sohaga oid vazirlik hamda idoralari vakillari ishtirok etgan. Yig‘ilish pandemiyaning turizmga ta’siri va uning oqibatlaridan tiklanish masalasiga qaratilgan.

Tadbir bosh vazir o‘rinbosari, Turizmni rivojlantirish davlat qo‘mitasi raisi Aziz Abduhakimov hamda mintaqaviy komissiya raisi — Gretsiya turizm vaziri Garri Teoxaris nutqi bilan ochildi.

“Turizm sanoati keng imkoniyatlar eshigini ochdi. Soha mavjud inqirozni yengib o‘tishi uchun barchamiz harakat qilishimiz lozim. Shundagina turizm sohasining pandemiya davrida barqaror rivojlanishiga erishamiz”, — dedi bosh vazir o‘rinbosari Aziz Abduhakimov.

Onlayn yig‘ilishda O‘zbekistonda turizm sektorining ijtimoiy himoyasiga katta e’tibor qaratilayotgani e’tirof etildi. Gid va ekskursiyachi xizmatlarining o‘z-o‘zini band qiluvchi shaxslarning shug‘ullanishi mumkin bo‘lgan soliqdan xoli faoliyat turlari ro‘yxatiga kiritilishi, ularning pensiya yoshiga yetganda pensiya nafaqasini olishi shular jumlasidandir. Shu bilan birga, noyabr oyining “uchinchi yosh turizm” oyi sifatida tanlanishi ham alohida o‘ringa ega bo‘lib, bu oyda keksalar uchun maxsus turistik paketlar ishlab chiqilib, imtiyozlar taqdim etiladi.

UNWTO bosh kotibi Zurab Pololikashvili nutqidan so‘ng Yevropa departamenti direktori Alissandra Priante COVID-19 davrida Yevropada olib borilgan ishlar hamda kelgusidagi tashabbuslarga doir ma’lumot berdi.

Tadbir ishtirokchilari navbatdagi 66-yig‘ilishni to‘liq formatda o‘tkazish masalasini muhokama qildi. Tadbir yakuniga ko‘ra, 2021-yilda UNWTO va Yevropa tiklanish va taraqqiyot banki bilan hamkorlikda turizm sohasida investitsiyalar mavzusidagi xalqaro konferensiyani O‘zbekistonda o‘tkazishga doir kelishuvga erishildi.