Қўл меҳнати асосида тоза ипакдан тўқилган Марғилон гиламларининг бир метри камида 25 минг долларга сотилмоқда. Бу ҳақда Фарғона вилояти ҳокимлиги томонидан журналист ва блогерлар учун ташкил этилган медиа-турда маълум қилинди, дея хабар берди «Дарё» мухбири Азизжон Эрматов.
Қайд этилишича, Марғилон шаҳрида давлат-хусусий шериклик асосида қурилган Ҳунармандчилик марказида 200 дан ортиқ турдаги атлас ва адрас тўқиш, гиламчилик, тикувчилик, ҳунармандчилик маҳсулотлари ишлаб чиқариш йўлга қўйилган.
Икки қаватли марказнинг қуйи қаватида атлас, адрас, шойи, бахмал, беқасам матолар тўқилади. Биринчи қаватдан тайёр маҳсулотлар кўргазмаси, подиум, чевархона ўрин олган. Бу ердаги дўконда матога гул чизиш, боғлаш, давра, қад тайёрлаш жараёнлари кўргазмали тарзда намойиш этилади. Бинонинг юқори қаватида гилам цехи жойлашган. Бу ерда барча маҳсулотлар тўлиқ қўл меҳнати ёрдамида 100 фоиз тоза ипакдан тўқилади.
«Исмоилжон гиламлари» корхонасига қарашли устахоналарда асл ипакка табиий бўёқлардан гул чизиб мато тўқилади. Бу матолардан тўқилган гиламлар Туркияга, атлас ва адрас матолар эса АҚШ, Италия, Франция, Россия каби мамлакатларга экспорт қилинади.
Корхона раҳбари Иброҳим Султоновнинг маълум қилишича, корхонада тўқилган 3,5-4 метр ҳажмдаги гилам 61 минг долларга сотилган. Кичик ҳажмдаги битта гиламни тўқиш учун олти ойдан бир йилгача вақт кетади. Гиламнинг ҳажми, ипак ва рангларининг сифати, тугунлари сонига қараб унга нарх белгиланади. Энг арзон гиламнинг баҳоси 25 минг доллардан бошланади.
Эслатиб ўтамиз, аввалроқ Марғилон шаҳрида Ҳунармандлар бозори ҳамда Ҳунармандчилик маркази фойдаланишга топширилгани ҳақида хабар берилганди.
Изоҳ (0)