O‘zbekistonda yana 51 kishi koronavirusdan sog‘aydi. Toshkent tibbiyot akademiyasining ko‘p tarmoqli klinikasida 27 nafar, Toshkent shahar 1-son klinik shifoxonasida 2 nafar, Qashqadaryo viloyatida 17 nafar, Namangan viloyatida 5 nafar, jami 51 nafar koronavirus infeksiyasiga chalingan bemor sog‘aydi. Bu haqda Sog‘liqni saqlash vazirligi xabar bermoqda.
Toshkentda tuzalganlarning 25 nafari erkaklar, 4 nafari ayollar bo‘lib, ularning eng yoshi ulug‘i 56 yoshda va eng kichigi 19 yoshda. Hududlar kesimida oladigan bo‘lsak, sog‘ayganlarning 13 nafari Toshkent shahridan, 6 nafari Qoraqalpog‘iston Respublikasidan, 3 nafari Qashqadaryo viloyatidan, 2 nafardan Andijon va Namangan viloyatlaridan va 1 nafardan Toshkent, Farg‘ona va Jizzax viloyatlaridan.
Shu tariqa ayni paytgacha Toshkent shahri va viloyatida koronavirus infeksiyasidan 2635 nafar bemor sog‘aydi.
5-iyunda koronavirus qaytgan Qashqadaryo viloyatida 17 kishi shifoxonalardan tuzalib chiqdi. Bungacha viloyatda oxirgi marta koronavirusga chalingan bemor 1-mayda sog‘ayib chiqqandi. COVID-19’dan tuzalganlarning 6 nafari ushbu hududdan bo‘lsa, 10 nafari Qozog‘iston, 1 nafari Turkiya fuqarosidir (11-iyun kuni viloyatda 27 nafar qozog‘istonlik va 1 nafar turkiyalik fuqaroda kasallik aniqlangandi). Ularning 14 nafari erkaklar, 3 nafari ayollar, shuningdek, eng yoshi kattasi 51 yoshda, kichigi esa 2019-yilda tug‘ilgan.
Endilikda Qashqadaryo viloyatida koronavirus infeksiyasidan sog‘ayganlarning soni 23 nafarga yetdi. 24-iyun holatiga ko‘ra, koronavirusdan davolanish ko‘rsatkichi ushbu viloyatda 3 foizni tashkil etayotgandi.
Namangan viloyatida kasallikdan forig‘ bo‘lganlarning barchasi ushbu hududdan. Ularning 4 nafari erkaklar va 1 nafari ayol bo‘lib, yoshi kattasi 51 yoshda, eng kichigi 2019-yilda tug‘ilgan. Bugungi kunda Namangan viloyatida koronavirusdan sog‘ayganlar soni 270 nafarga yetdi.
25-iyun davomida O‘zbekistonda 90 nafar koronavirus infeksiyasiga chalingan bemor tuzaldi. Mamlakatda sog‘ayganlar soni 4775 nafarni tashkil etmoqda.
O‘zbekistonda ayni damda 25-iyun soat 17:00 holatiga ko‘ra, 7087 kishida kasallik aniqlanib, ulardan 20 nafari koronavirus asoratlari oqibatida vafot etgan.
Izoh (0)