Amerikalik tadbirkor, dasturchi va Google asoschisi Sergey Brinning tabiiy ofatlarga qarshi harakat qilishga qodir sobiq harbiy va tansoqchilardan tuzilgan maxfiy guruhi mavjud, deb yozadi The Daily Beast.
Global Support and Development xususiy tashkiloti tezkor harakatlanish guruhi kabi ishlaydi. Uning yagona homiysi — 46 yoshli milliarder.
Guruh a’zolari butun dunyo bo‘ylab aylanib, tabiiy ofat oqibatlarini bartaraf etish bilan shug‘ullanadi. Tashkilot ixtiyorida eng yuqori texnikalar, jumladan, Brinning 80 million dollar turadigan Dragonfly yaxtasi, uchuvchisiz boshqariladigan qurilmalar va dirijabllar mavjud.
Global Support and Development’ga AQSh Harbiy-dengiz kuchlarining sobiq leytenanti Grant Douson rahbarlik qiladi, u bir necha yil Brinning shaxsiy xavfsizlik xizmatida ishlagan.
Nashrning ta’kidlashicha, Sergey Brinda bu kabi tashkilotni yaratish fikri besh yil oldin paydo bo‘lgan. U o‘zining yaxtasida sayohat qilib yurganida, Pem to‘foni yopirilgan Vanuatu oroliga yaqinidan suzib o‘tgan. Brin jabrlangan aholiga yordam berishga qaror qilgan va Douson bilan bog‘langan. U esa o‘ziga o‘xshagan xodimlar bilan birga, barcha zaruriy narsalar, jumladan, oziq-ovqat va dori-darmonlar bilan yordamga yetib kelgan.
Ta’kidlanishicha, 2015-yildan buyon tashkilot to‘fonlar yopirilgan, vulqonlar otilgan yoki zilzilalar sodir bo‘lgan ko‘plab joylarga bir necha bor yordam ko‘rsatib kelmoqda. Sergey Brinning o‘zida ushbu tashkilot haqida hech qanday izoh bermagan.
Ma’lumot uchun, Google asoschisining boyligi hozirda 63,5 milliard dollarni tashkil etadi.
Izoh (0)