Бирлашган Миллатлар Ташкилоти (БМТ)нинг Бутунжаҳон туризм ташкилоти (UNWTO) Европа минтақавий комиссиясининг 65-йиғилишига Самарқанд шаҳри мезбонлик қилди. Тадбир бош вазир ўринбосари, Туризмни ривожлантириш давлат қўмитаси раиси Азиз Абдуҳакимов бошчилигида ўтди. Бу ҳақда «Дарё» мухбири Фарҳод Норбўтаев хабар берди.
Коронавирус пандемияси сабаб онлайн видеоконференция шаклида ўтган тадбирда 40 дан ортиқ давлатнинг туризм ва соҳага оид вазирлик ҳамда идоралари вакиллари иштирок этган. Йиғилиш пандемиянинг туризмга таъсири ва унинг оқибатларидан тикланиш масаласига қаратилган.
Тадбир бош вазир ўринбосари, Туризмни ривожлантириш давлат қўмитаси раиси Азиз Абдуҳакимов ҳамда минтақавий комиссия раиси — Греция туризм вазири Гарри Теохарис нутқи билан очилди.
«Туризм саноати кенг имкониятлар эшигини очди. Соҳа мавжуд инқирозни енгиб ўтиши учун барчамиз ҳаракат қилишимиз лозим. Шундагина туризм соҳасининг пандемия даврида барқарор ривожланишига эришамиз», — деди бош вазир ўринбосари Азиз Абдуҳакимов.
Онлайн йиғилишда Ўзбекистонда туризм секторининг ижтимоий ҳимоясига катта эътибор қаратилаётгани эътироф этилди. Гид ва экскурсиячи хизматларининг ўз-ўзини банд қилувчи шахсларнинг шуғулланиши мумкин бўлган солиқдан холи фаолият турлари рўйхатига киритилиши, уларнинг пенсия ёшига етганда пенсия нафақасини олиши шулар жумласидандир. Шу билан бирга, ноябрь ойининг «учинчи ёш туризм» ойи сифатида танланиши ҳам алоҳида ўринга эга бўлиб, бу ойда кексалар учун махсус туристик пакетлар ишлаб чиқилиб, имтиёзлар тақдим этилади.
UNWTO бош котиби Зураб Пололикашвили нутқидан сўнг Европа департаменти директори Алиссандра Прианте COVID-19 даврида Европада олиб борилган ишлар ҳамда келгусидаги ташаббусларга доир маълумот берди.
Тадбир иштирокчилари навбатдаги 66-йиғилишни тўлиқ форматда ўтказиш масаласини муҳокама қилди. Тадбир якунига кўра, 2021 йилда UNWTO ва Европа тикланиш ва тараққиёт банки билан ҳамкорликда туризм соҳасида инвестициялар мавзусидаги халқаро конференцияни Ўзбекистонда ўтказишга доир келишувга эришилди.
Изоҳ (0)