Isroilda o‘tgan bir sutka ichida koronavirus bilan kasallanish bo‘yicha yana 459 ta holat qayd etildi — bu 22-apreldan buyon kuzatilgan eng katta o‘sish hisoblanadi. Bu haqda Isroil Sog‘liqni saqlash vazirligiga tayanib, Haaretz xabar berdi.
Ta’kidlanishicha, kasallar sonining ortishi “mamlakatda maktablar, korxonalar, restoran va barlar, shuningdek, turistik maskanlar qayta ochilishi sabab” kuzatilmoqda.
Isroil hukumati koronavirus infeksiyasiga chalinganlar soni ortib ketayotgani sabab mamlakatdagi bir necha hududga kirish va chiqishni cheklab qo‘ydi. Mazkur cheklov 24-iyundan kuchga kiradi va bir hafta davom etadi. Bu kabi hududlar qatoridan Elad va Tveriya shaharlari o‘rin olgan.
Isroil hukumati rahbari Benyamin Netanyaxuning so‘zlariga ko‘ra, boshqa hududlarga ham cheklovlarni joriy etish masalasi 24-iyun kuni ko‘rib chiqiladi.
So‘nggi ma’lumotlarga ko‘ra, Isroilda koronavirus bilan kasallanganlar soni 21,5 ming kishidan oshgan, hozirga qadar 15,7 ming odam sog‘aygan.
2020-yil 7-iyunda COVID-19’dan vafot etganlar soni dunyo miqyosida 400 ming nafardan oshib ketgandi. 8-iyun kuni koronavirus bilan kasallanganlar soni dunyo miqyosida 7 million nafardan, 16-iyunda 8 milliondan, 23-iyun kuni esa 9 milliondan ortib ketgani xabar qilingan.
Izoh (0)