Исроилда ўтган бир сутка ичида коронавирус билан касалланиш бўйича яна 459 та ҳолат қайд этилди — бу 22 апрелдан буён кузатилган энг катта ўсиш ҳисобланади. Бу ҳақда Исроил Соғлиқни сақлаш вазирлигига таяниб, Haaretz хабар берди.
Таъкидланишича, касаллар сонининг ортиши «мамлакатда мактаблар, корхоналар, ресторан ва барлар, шунингдек, туристик масканлар қайта очилиши сабаб» кузатилмоқда.
Исроил ҳукумати коронавирус инфекциясига чалинганлар сони ортиб кетаётгани сабаб мамлакатдаги бир неча ҳудудга кириш ва чиқишни чеклаб қўйди. Мазкур чеклов 24 июндан кучга киради ва бир ҳафта давом этади. Бу каби ҳудудлар қаторидан Элад ва Тверия шаҳарлари ўрин олган.
Исроил ҳукумати раҳбари Бенямин Нетаньяхунинг сўзларига кўра, бошқа ҳудудларга ҳам чекловларни жорий этиш масаласи 24 июнь куни кўриб чиқилади.
Сўнгги маълумотларга кўра, Исроилда коронавирус билан касалланганлар сони 21,5 минг кишидан ошган, ҳозирга қадар 15,7 минг одам соғайган.
2020 йил 7 июнда COVID-19’дан вафот этганлар сони дунё миқёсида 400 минг нафардан ошиб кетганди. 8 июнь куни коронавирус билан касалланганлар сони дунё миқёсида 7 миллион нафардан, 16 июнда 8 миллиондан, 23 июнь куни эса 9 миллиондан ортиб кетгани хабар қилинган.
Изоҳ (0)