Хоразм вилоятида тадбиркорнинг автомобилларга ёқилғи қуйиш шохобчасини автомобилларга сиқилган газ тўлдириш компрессор станциясига айлантириш учун зарур ҳужжатларни расмийлаштириш масаласини ҳал қилиб бермоқчи бўлган шахс тадбиркордан 45 минг доллар сўради. Бу ҳақда «Ўзбекистон 24» телеканалининг «Ахборот 24» дастурида маълум қилинди.
Хабар берилишича, Хоразм вилояти Урганч туманида яшовчи тадбиркор ўзига тегишли бўлган автомобилларга ёқилғи қуйиш шохобчасини реконструкция қилиш йўли билан автомобилларга сиқилган газ тўлдириш компрессор станциясига айлантириш учун тегишли ҳужжатларни жорий йилнинг январь ойида вилоят ҳокимлигига тақдим этган.
Бироқ ҳозиргача унинг масаласи ҳал этилмаганидан хабар топган уддабурон шахс гўёки ҳокимият идораларидаги танишлари орқали унинг муаммосини ҳал қилиб беришини айтиб, эвазига 45 минг доллар сўраган.
ДХХ Хоразм вилояти бошқармаси ва вилоят прокуратураси ходимлари томонидан ўтказилган тезкор тадбирда мазкур шахс тадбиркордан 44 минг доллар олаётган вақтида ушланган.
Аввалроқ Тошкент вилоятида 60 минг долларга ер сотмоқчи бўлган туман ҳокими ўринбосари қўлга олингани, Тошкент вилоятида ҳарбий қисм майори 3 минг доллар пора билан ушлангани ҳақида хабарлар берилганди.
Мавзуга доир:
- Фарғонада қурилиш объектини олиб бериши эвазига 5 минг доллар сўраган қишлоқ хўжалиги ҳисобчиси фирибгарлик устида ушланди
- Марҳаматда тадбиркорлик учун ер ажратиб бериш эвазига 4 кишидан 8250 доллар олган шахс ушланди
- Муборакда тадбиркорнинг 150 млн сўмини қўлга киритган фирибгарга нисбатан жиноят иши қўзғатилди
- Андижонда электр ҳисоблагичдаги «камчиликни ёпиб бериш» учун 400 доллар сўраган шахс қўлга олинди
Изоҳ (0)