Volkswagen kompaniyasi e-Golf elektroxetchbekini buyurtma qilgan mijozlarga yangi xizmatlarni taklif etadi. Xaridorlar Drezdendagi konveyrga kirishi va 215 yevro evaziga o‘z mashinasining yig‘ilishini tomosha qilishi mumkin, deb xabar beradi Motor.
Korxona hududiga kirish konsern xodimlari tomonidan qattiq nazorat qilinadi. To‘rt kishidan iborat tashrif buyuruvchilar guruhi mashinani yig‘ishning beshta bosqichida qatnasha oladi. Ular mustaqil ravishda sovitish tizimiga radiator panjarasini, fonarlarni, Golf’ning yorlig‘ini, shuningdek, dvigatel va kuzovni o‘rnatishda ham ishtirok etishi mumkin.
Elektrokarni yig‘ishning besh bosqichi 2,5 soat vaqtni oladi. Avtomobilni yig‘ish jarayonida bevosita ishtirok etishdan tashqari, mijozlar gid bilan korxonaning ishlab chiqarish va ko‘rgazma zonasida ekskursiya uyushtirishi mumkin. Konsernning suvenir tovarlari va ichimliklari uchun 10 foizli chegirma ham taklif etiladi.
2020-yil Volkswagen e-Golf ishlab chiqariladigan so‘nggi yil hisoblanadi. Kelajakdan uning o‘rniga MEB modul platformasida yaratiladigan ID.3 elektroxetchbeki keladi. ID.3 xaridorlari keyingi yildan boshlab o‘z elektrokarlarini yig‘ish jarayonlarida ishtirok etishlari mumkin bo‘ladi.
Avvalroq O‘zbekistonda Volkswagen avtomobillarini ishlab chiqarish boshlanayotgani to‘g‘risida xabar berilgandi.
Izoh (0)