Qashqadaryo viloyatining Kasbi tumanida Nexia va Tico ishtirokida YTH sodir bo‘ldi. Voqeani o‘rgangan YPX inspektorlari YTHga yo‘lning nosozligi sabab bo‘lganini aytmoqda. Bu haqda “Daryo”ga Kasbi tuman IIB Yo‘l harakati xavfsizligi bo‘limi boshlig‘i Olim Eshmamatov xabar berdi.
Joriy yilning 11-iyun kuni Koson—Qarliq—Muborak avtomobil yo‘lining Maymanoq qishlog‘idan o‘tuvchi 11-kilometrida yo‘l transport hodisasi sodir etilgan. Haydovchi O.O. boshqaruvidagi Nexia orqaga burilayotgan M.I. boshqaruvidagi Tico’ga urilgan. Oqibatda Tico avtomashinasidagi yo‘lovchilar — 32 yoshli ayol va uning 7 yoshli qizi jarohat olgan. Jabrlanuvchilar zudlik bilan Kasbi tuman tibbiyot birlashmasiga yotqizilib, davolash ishlari boshlangan.
Hodisa joyiga yetib borgan Kasbi tuman yo‘l harakati xavfsizligi inspektorlari voqea sabablarini o‘rgangan va YTHga haydovchilarning aybidan tashqari yo‘lning nosozligi ham sabab bo‘lgan, degan xulosaga kelgan.
Tuman YPX inspektorlari boshlig‘i Olim Eshmamatovga ko‘ra, hodisa sodir bo‘lgan yo‘lda yo‘l kesishmalarini anglatuvchi belgilar mavjud emas. Shuningdek, yo‘l nosoz, piyodalar yo‘lagi va hatto yo‘l yotiq chiziqlari ham chizilmagan.
Kasbi tuman IIB yo‘ldagi kamchiliklar bartaraf etilishini so‘rab, mazkur hududdagi yo‘llarni nazorat qiluvchi Koson tuman yo‘llardan foydalanish unitar korxonasi, Koson tuman hokimligi va prokuraturasiga taqdimnoma kiritgan.
Izoh (0)