Germaniyaning Auto Bild nashri Texnik nazorat tashkiloti (TÜV) bilan birgalikda Yevropa bozorlaridagi minilgan eng ishonchli ixcham krossoverlar ro‘yxatini taqdim etdi, deb xabar beradi Motor.
Ro‘yxatning birinchi pog‘onasidan 2015-yili sotuvga chiqqan Mazda CX-3 o‘rin oldi. Krossover Mazda2 bazasida yaratilgan bo‘lib, texnik jihatdan uni ortda qoldiradi — model Yevropada tavsiya qilinadigan CX-5’ga yaqinroq turadi. Biroq xaridorlarga minilgan avtomobilning amortizatorlariga e’tibor berish tavsiya qilinadi.
Ikkinchi o‘rin bir necha bor TÜV’ning e’tirofiga sazovor bo‘lgan Volkswagen Tiguan platformasida yaratilgan Audi Q3’ga nasib etdi. Ekspertlarning fikricha, Q3’ning muammoli joyi — tormoz disklarining zanglashida.
Shuningdek, ro‘yxatdan eng ishonli yapon krossoverlaridan hisoblanuvchi Suzuki SX4 S-Cross ham o‘rin olgan, biroq unda moy sarfi bilan bog‘liq muammo kuzatilgan. Suzuki’ning yana bir modeli — Vitara reytingdan o‘rin olgan. Undan keyingi pog‘onada esa 2019-yili ishlab chiqarishdan olingan Opel Mokka X joylashgan.
2009-yildan buyon ishlab chiqariladigan BMW X1’ning barcha avlodlari ishonchli deb topilgan, ammo ekspertlar xaridorlarga krossoverning tormoz tizimiga e’tibor qaratishni maslahat beradi. Bu kabi muammo Mitsubishi ASX’da ham kuzatilishi mumkin.
Renult Captur ham TÜV’ning yuqori bahosiga sazovor bo‘lgan, fransuz krossvorining birgina muammosi — podveskasi, birinchi avlod Nissan Qashqai’da ham shu kabi kamchilik mavjud.
Shuningdek, Ford EcoSport, Nissan Juke, Peugeot 2008 va Renault Duster modellarining ishonchliligida muammo paydo bo‘lgan. Ayniqsa Duster’da — mutaxassislar mazkur krossoverning minilganini xarid qilishni tavsiya etmaydi.
Eslatib o‘tamiz, TÜV tashkiloti mutaxassislari aprel oyida Yevropa bozorlarida sotilayotgan deyarli buzilmaydigan avtomobillar reytingini tuzib chiqqandi.
Mavzuga doir: Dunyodagi eng yaxshi avtomobil nomi e’lon qilindi
Izoh (0)