O‘zbekistonda 18-iyun soat 23:00 holatiga ko‘ra yana 37 kishi koronavirus yuqtirib oldi va kasallanganlarning umumiy soni 5767 nafarga yetdi. Bu haqda Sog‘liqni saqlash vazirligi xabar qildi.
Yangi kasallanish holatlarining 2 tasi karantin markazidagi fuqarolar orasida, 32 tasi Toshkent viloyatida (shundan 18 nafari karantinga olinganlar, 14 nafari aholi orasida), 3 tasi esa Toshkent shahrida aholi orasida aniqlangan.
Avval 18-iyun soat 10:00 holatiga ko‘ra 9 kishida, keyinroq soat 17:00 holatiga ko‘ra 33 kishida koronavirus aniqlangan va kasallanganlarning umumiy soni 5730 nafarga yetgandi.
Shuningdek, 18-iyunda kun davomida jami 68 nafar bemor kasallikdan tuzalgan, O‘zbekiston bo‘ylab koronavirus infeksiyasidan sog‘ayganlar soni 4199 nafarni (72 foiz) tashkil etmoqda. Toshkent shahrida koronavirus infeksiyasidan sog‘ayganlar soni 2130 nafarga yetgan. Respublika miqyosida 1549 nafar fuqaro statsionar sharoitda davolanishni davom ettirmoqda.
COVID-19 koronavirusi O‘zbekiston hududiga kirib kelganidan buyon jami 19 nafar bemor mazkur infeksiya asoratlari oqibatida hayotdan ko‘z yumgan.
17-iyunda O‘zbekiston shifoxonalaridagi koronavirusga chalingan bemorlar soni birinchi marta 1500 nafardan oshib ketgan.
Izoh (0)