O‘zbekiston Monopoliyaga qarshi kurashish qo‘mitasi Orol dengizini bitta korxonaga topshirishni maqsadga muvofiq emas deb topdi. Bu haqda qo‘mita matbuot xizmati xabar berdi.
Gap Vazirlar Mahkamasining “Qoraqalpog‘iston Respublikasi Mo‘ynoq tumanida artemiya sistasini ovlash va qayta ishlashni samarali tashkil etish va yanada rivojlantirish chora-tadbirlari to‘g‘risida”gi qaror loyihasi haqida ketmoqda.
Mazkur qaror loyihasida Mo‘ynoq tumani hokimligi huzurida “Orol artemiya sanoat” davlat unitar korxonasini tashkil etish va Orol dengizining O‘zbekistonga tegishli barcha qismini artemiya sistasini ovlash va qayta ishlash tarmog‘ini rivojlantirish uchun 2020-yil 1-apreldan boshlab belgilangan tartibda “Orol artemiya sanoat” DUKga doimiy alohida foydalanish uchun o‘tkazish nazarda tutilgan.
Qo‘mitaning ta’kidlashicha, bugungi kunda Mo‘ynoq tumanida artemiya sistalarini ovlash, quritish, qayta ishlangan mahsulotni eskporti bilan 23 ta subyektlar shug‘ullanib kelmoqda.
“Mazkur bozorda (artemiya sistasi yetishtirish va sotish) davlat unitar korxonasini tashkil etish maqsadga muvofiq emas. Orol dengizining O‘zbekistonga tegishli barcha qismini artemiya sistasini ovlash va qayta ishlash tarmog‘ini rivojlantirish uchun barcha tadbirkorlik subyektlariga teng sharoitlar yaratish, shu soha bilan shug‘ullanuvchi tadbirkorlik subyektlari faoliyatini kengaytirish uchun ko‘maklashish kerak”, — deyiladi qo‘mita xulosasida.
Shuningdek, artemiya sistasi yetishtiruvchi tadbirkorlik subyektlariga kvotalar ajratishda xomashyoni chuqur qayta ishlashni tashkil etish talabini belgilash yuzasidan xulosa taqdim etilgan.
Avvalroq Vazirlar Mahkamasining “Orol dengizi akvatoriyasi va unga tutash hududlarning neftgazlilik salohiyatini geologik jihatdan o‘rganish chora-tadbirlari to‘g‘risida”gi qarori loyihasi muhokama uchun joylashtirilgani to‘g‘risida xabar berilgandi.
Izoh (0)