Ўзбекистон Монополияга қарши курашиш қўмитаси Орол денгизини битта корхонага топширишни мақсадга мувофиқ эмас деб топди. Бу ҳақда қўмита матбуот хизмати хабар берди.
Гап Вазирлар Маҳкамасининг «Қорақалпоғистон Республикаси Мўйноқ туманида артемия цистасини овлаш ва қайта ишлашни самарали ташкил этиш ва янада ривожлантириш чора-тадбирлари тўғрисида»ги қарор лойиҳаси ҳақида кетмоқда.
Мазкур қарор лойиҳасида Мўйноқ тумани ҳокимлиги ҳузурида «Орол артемия саноат» давлат унитар корхонасини ташкил этиш ва Орол денгизининг Ўзбекистонга тегишли барча қисмини артемия цистасини овлаш ва қайта ишлаш тармоғини ривожлантириш учун 2020 йил 1 апрелдан бошлаб белгиланган тартибда «Орол артемия саноат» ДУКга доимий алоҳида фойдаланиш учун ўтказиш назарда тутилган.
Қўмитанинг таъкидлашича, бугунги кунда Мўйноқ туманида артемия цисталарини овлаш, қуритиш, қайта ишланган маҳсулотни эскпорти билан 23 та субъектлар шуғулланиб келмоқда.
«Мазкур бозорда (артемия цистаси етиштириш ва сотиш) давлат унитар корхонасини ташкил этиш мақсадга мувофиқ эмас. Орол денгизининг Ўзбекистонга тегишли барча қисмини артемия цистасини овлаш ва қайта ишлаш тармоғини ривожлантириш учун барча тадбиркорлик субъектларига тенг шароитлар яратиш, шу соҳа билан шуғулланувчи тадбиркорлик субъектлари фаолиятини кенгайтириш учун кўмаклашиш керак», — дейилади қўмита хулосасида.
Шунингдек, артемия цистаси етиштирувчи тадбиркорлик субъектларига квоталар ажратишда хом ашёни чуқур қайта ишлашни ташкил этиш талабини белгилаш юзасидан хулоса тақдим этилган.
Аввалроқ Вазирлар Маҳкамасининг «Орол денгизи акваторияси ва унга туташ ҳудудларнинг нефтгазлилик салоҳиятини геологик жиҳатдан ўрганиш чора-тадбирлари тўғрисида»ги қарори лойиҳаси муҳокама учун жойлаштирилгани тўғрисида хабар берилганди.
Изоҳ (0)