Наманган вилоятида болаларнинг мажбурий меҳнатга жалб этиш ҳолатлари аниқланмади. Бу ҳақда Бандлик ва меҳнат муносабатлари вазирлиги матбуот хизмати хабар берди.
Идора маълумотларига кўра, 30 майдан 7 июнга қадар Поп туманида мониторинг ўтказган фаоллар ўсмирнинг пахта даласида юргани тўғрисида маълум қилган. Мазкур маълумотни текшириш мақсадида Наманган вилояти Давлат меҳнат инспекцияси фаоллари ва жойлардаги масъуллар билан боғланган.
«Боланинг далада пайдо бўлиш ҳолати тафсилотларини ўрганиш натижасида бола ‘Жавлонбек-Жанона-Жўрабек’, ‘Абдурауф Поп Чодак’, ‘Шоҳзамон Пунгон’, ‘Саидислом Хожиакбар келажак’, ‘Поп Ғолиб Камол’, ‘Ғайрат Чодак Поп’ фермерлик хўжаликларининг ёлланма ишчилари ҳисобланган ота-онаси ортидан эргашганлиги аниқланди. У далага ўз ихтиёри билан келган, ҳозирги карантин чекловлари даврида ўқишнинг йўқлиги ва болани банд қилишнинг бошқа чоралари мавжуд бўлмаганлиги сабабли ота-онаси уни ўзлари билан олиб кетишга рози бўлган. Болани меҳнатга мажбурий жалб қилиш ҳолати бўлмаган», — дейилади хабарда.
Маълумот учун, «Ўн саккиз ёшдан кичик шахсларнинг меҳнати қўлланиши тақиқланадиган ноқулай меҳнат шароитлари ишлари рўйхати»ни тасдиқлаш тўғрисидаги қўшма қарорга мувофиқ, қишлоқ хўжалиги соҳасида пахтани қўлда суғоришда ва пахтани қўлда теришда ўн саккиз ёшга тўлмаган шахслар меҳнатидан фойдаланиш тақиқланган бўлса-да, уларнинг пахта чопиғи ишларида қатнашиши тақиқланмаган.
Таъкидланишича, Бандлик ва меҳнат муносабатлари вазирлиги уч тарафлама шериклар билан биргаликда юзага келиши мумкин бўлган хавф-хатарларни ўрганмоқда, болалар меҳнатига йўл қўйилишини фавқулодда ҳолат деб қараб, Ўзбекистонда мажбурий меҳнатни бартараф этиш бўйича ислоҳотларнинг жорий этилишини мустаҳкамламоқда.
Шу билан бирга, барча ҳудудий Давлат меҳнат инспекциялари томонидан мавсумий ишчиларни қишлоқ хўжалик ишларига жалб этишда, шу жумладан, меҳнат шартномаларини расмийлаштириш, иш ҳақини ўз вақтида тўлаш, зарур шароитларни яратиш кабиларда барча фермер хўжаликлари ва кластерларда семинарлар ўтказиш йўли билан тушунтириш ҳамда мониторинг ишларини олиб бориш бўйича қўшимча ишлар олиб борилмоқда.
Шунингдек, ижтимоий тармоқлар орқали тарқалган, фаолларнинг инсон ҳуқуқларининг ва карантин талабларининг бузилиши эҳтимоли юзасидан Бош прокуратура томонидан ўрганиш ишлари ўтказилмоқда.
Аввалроқ Ўзбекистон Cotton Campaign’ни 2020 йилги пахта терими мониторингига таклиф қилгани тўғрисида хабар берилганди.
Мавзуга доир:
Изоҳ (0)