O‘zbekistonda 6 soat ichida 165 kishida koronavirus aniqlandi. Ushbu holatlarning 104 tasi Qashqadaryoda qayd etildi

O‘zbekistonda 16-iyun soat 23:00 holatiga ko‘ra, 165 kishida koronavirus infeksiyasi qayd etildi. Bu haqda Sog‘liqni saqlash vazirligi xabar berdi.

Yangi kasallanish holatlarining

• 27 tasi karantin markazidagi fuqarolar (barchasi xorijdan kelgan) orasida;
• 104 tasi Qashqadaryo viloyatida koronavirusga chalinganlar bilan muloqotda bo‘lib, karantinga olinganlar orasida;
• 13 tasi Toshkent shahrida (shundan 7 tasi koronavirusga chalinganlar bilan muloqotda bo‘lgan, 6 tasi esa aholi orasida);
• 7 tasi Toshkent viloyatida;
• 5 tasi Sirdaryo viloyatida xorijdan kirib kelgan xalqaro yuk tashuvchi avtomashina haydovchilarida;
• 5 tasi Namangan viloyatida (shundan 4 tasi koronavirusga chalinganlar bilan muloqotda bo‘lgan, 1 tasi aholi orasida);
• 4 tasi Buxoro viloyatida (shundan 1 tasi koronavirusga chalinganlar bilan muloqotda bo‘lgan, 3 tasi esa aholi orasida) aniqlangan.

Avval O‘zbekistonda 16-iyun soat 17:00 holatiga ko‘ra, koronavirus infeksiyasini yuqtirib olish bilan bog‘liq 35 ta yangi holat qayd etilgani va kasallanganlarning umumiy soni 5328 nafarga yetgani haqida xabar berilgandi.

16-iyun holatiga ko‘ra, kun davomida O‘zbekiston bo‘ylab koronavirus infeksiyasidan jami sog‘ayganlar soni 4096 nafarga yetgani va shifoxonalarda 1213 nafar bemor davolanayotgani ma’lum qilingan. Kun davomida jami 77 nafar bemor sog‘ayib, o‘z uylariga kuzatilgan. Shu kuni kasallikdan forig‘ bo‘lgan bemorlarning barchasi poytaxtdagi davolash muassasalarida tuzalgan.

Eslatib o‘tamiz, 15-martda epidemiya boshlanganidan beri O‘zbekistonda 19 nafar bemor COVID-19 asoratlari oqibatida vafot etgan. Iyun oyining o‘zida 4 nafar COVID-19 tufayli hayotdan ko‘z yumgan.