O‘zbekistonda koronavirus oqibatida yuzaga kelgan murakkab iqtisodiy vaziyat sababli ommaviy tadbirlarni tashkillashtirish sohasida ishlayotgan ko‘plab tadbirkorlar va event-kompaniyalar xodimlari nomidan Tadbir tashkilotchilari milliy uyushmasi Prezident Shavkat Mirziyoyevga murojaat qildi.
Uyushma o‘z murojaatida COVID-19 pandemiyasi ommaviy tadbirlarni tashkil etish sohasiga nafaqat halokatli, balki uzoq muddatli zarar keltirganini, bu qiyin vaziyatda hayotga qaytadigan so‘nggi sohalardan biri aynan mana shu soha bo‘lishini ta’kidlab o‘tgan.
Ma’lum qilinishicha, yetarlicha xavfsizlikka ega bo‘lmagan sohaning ko‘plab kichik kompaniyalari allaqachon bozorni tark etgan, ammo yaqin kelajakda ushbu holat hatto uch oy davomida xodimlariga to‘lovlarni amalga oshirib kelayotgan tashkilotlarda ham kuzatilishi mumkin.
Qayd etilishicha, event-аgentlik kadrlarini tayyorlash uzoq vaqt davom etadigan mashaqqatli ish bo‘lib, bu yo‘nalish oliy o‘quv yurtlarida o‘qitilmaydi. “Uzoq yillar davomida O‘zbekistonda shakllangan malakali mutaxassislar doirasi esa bu tadbirkorlarning uzoq muddatli mehnat va sarmoyalarining natijasidir”, — deyiladi murojaatda. Qayd etilishicha, kam zarar ko‘radigan sohalarga ketayotgan ushbu mutaxassislarning yo‘qolishi ushbu soha uchun qaytarilmas yo‘qotish bo‘lib, kelajakda respublikada istalgan ko‘lamdagi tadbirlarni tashkil etish darajasiga sezilarli ta’sir qiladi.
Shuningdek, uyushma mavjud cheklovlar tadbirlarni o‘tkazishga ixtisoslashgan kompaniyalarning ko‘plab hamkorlariga ham ta’sir ko‘rsatayotganini bildirgan. Mazkur hamkorlar vizual, ovoz va yoritish uskunalarini yetkazib beruvchilar, dekoratorlar, bezatuvchilar va boshqalar hisoblanadi. Ma’lum qilinishicha, ularning barchasi hozirda juda katta qiyinchiliklarni boshdan kechirmoqda, chunki boshqa sohalardan farqli o‘laroq, kelgusi oylarda ular koronavirus yetkazgan yo‘qotishlarni qoplash imkoniyatiga ega emas.
Qayd etib o‘tilgan holatdan kelib chiqib, Tadbir tashkilotchilari milliy uyushmasi tadbirlarni tashkil etish, bezatish/dekor, tadbirlarni o‘tkazish joylarini qurish, tadbirlarni o‘tkazish uchun texnik jihozlarni ijaraga berish, keytering, foto/video suratga olish yo‘nalishlarda faoliyat yuritadigan kichik va o‘rta biznes toifalariga mansub kompaniyalarni qo‘llab-quvvatlash choralarini ko‘rish orqali event-sanoat sohasiga e’tibor qaratishni so‘ragan.
Shuningdek, uyushma uzoq muddatli foizsiz kreditlar berish, daromad, mulk va yer solig‘idan ozod qilish shaklida yordam ham so‘ragan.
Eslatib o‘tamiz, O‘zbekistonda koronavirus sababli qiyin ahvolga tushib qolgan kompaniyalar va sohalarni qo‘llab-quvvatlash uchun bir qator imtiyozlar taqdim etilgan.
Izoh (0)