Ўзбекистонда коронавирус оқибатида юзага келган мураккаб иқтисодий вазият сабабли оммавий тадбирларни ташкиллаштириш соҳасида ишлаётган кўплаб тадбиркорлар ва эвент-компаниялар ходимлари номидан Тадбир ташкилотчилари миллий уюшмаси Президент Шавкат Мирзиёевга мурожаат қилди.
Уюшма ўз мурожаатида COVID-19 пандемияси оммавий тадбирларни ташкил этиш соҳасига нафақат ҳалокатли, балки узоқ муддатли зарар келтирганини, бу қийин вазиятда ҳаётга қайтадиган сўнгги соҳалардан бири айнан мана шу соҳа бўлишини таъкидлаб ўтган.
Маълум қилинишича, етарлича хавфсизликка эга бўлмаган соҳанинг кўплаб кичик компаниялари аллақачон бозорни тарк этган, аммо яқин келажакда ушбу ҳолат ҳатто уч ой давомида ходимларига тўловларни амалга ошириб келаётган ташкилотларда ҳам кузатилиши мумкин.
Қайд этилишича, эвент-агентлик кадрларини тайёрлаш узоқ вақт давом этадиган машаққатли иш бўлиб, бу йўналиш олий ўқув юртларида ўқитилмайди. «Узоқ йиллар давомида Ўзбекистонда шаклланган малакали мутахассислар доираси эса бу тадбиркорларнинг узоқ муддатли меҳнат ва сармояларининг натижасидир», — дейилади мурожаатда. Қайд этилишича, кам зарар кўрадиган соҳаларга кетаётган ушбу мутахассисларнинг йўқолиши ушбу соҳа учун қайтарилмас йўқотиш бўлиб, келажакда республикада исталган кўламдаги тадбирларни ташкил этиш даражасига сезиларли таъсир қилади.
Шунингдек, уюшма мавжуд чекловлар тадбирларни ўтказишга ихтисослашган компанияларнинг кўплаб ҳамкорларига ҳам таъсир кўрсатаётганини билдирган. Мазкур ҳамкорлар визуал, овоз ва ёритиш ускуналарини етказиб берувчилар, декораторлар, безатувчилар ва бошқалар ҳисобланади. Маълум қилинишича, уларнинг барчаси ҳозирда жуда катта қийинчиликларни бошдан кечирмоқда, чунки бошқа соҳалардан фарқли ўлароқ, келгуси ойларда улар коронавирус етказган йўқотишларни қоплаш имкониятига эга эмас.
Қайд этиб ўтилган ҳолатдан келиб чиқиб, Тадбир ташкилотчилари миллий уюшмаси тадбирларни ташкил этиш, безатиш/декор, тадбирларни ўтказиш жойларини қуриш, тадбирларни ўтказиш учун техник жиҳозларни ижарага бериш, кейтеринг, фото/видео суратга олиш йўналишларда фаолият юритадиган кичик ва ўрта бизнес тоифаларига мансуб компанияларни қўллаб-қувватлаш чораларини кўриш орқали эвент-саноат соҳасига эътибор қаратишни сўраган.
Шунингдек, уюшма узоқ муддатли фоизсиз кредитлар бериш, даромад, мулк ва ер солиғидан озод қилиш шаклида ёрдам ҳам сўраган.
Эслатиб ўтамиз, Ўзбекистонда коронавирус сабабли қийин аҳволга тушиб қолган компаниялар ва соҳаларни қўллаб-қувватлаш учун бир қатор имтиёзлар тақдим этилган.
Изоҳ (0)