Boris Jonson namoyishchilarning britaniyalik buyuk shaxslarga atab o‘rnatilgan yodgorliklarni buzib tashlash to‘g‘risidagi talabini rad etdi

Radikal harakat a’zolari so‘nggi kunlarda ko‘plab mamlakatlarda irqchilikka qarshi o‘tkazilayotgan norozilik namoyishlarini o‘z nazorati ostiga olgan. Bu haqda Buyuk Britaniya bosh vaziri Boris Jonson o‘zining Twitter’dagi sahifasi orqali ma’lum qildi.

Jonsonning yozishicha, u irqchilikka qarshi kurash doirasida Britaniya ko‘chalaridan buyuk tarixiy shaxslarga qo‘yilgan yodgorliklarni olib tashlash to‘g‘risidagi taklifni qoralaydi. Xususan, u sobiq bosh vazir Uinston Cherchill va uning London markazidagi haykaliga hujum qilishdan saqlanishga chaqirdi.

“Bu — doimo Cherchill o‘z davlatini va butun Yevropani fashistik va irqchilik zolimligidan qutqarganini yodga solib turadi. Millat uchun muhim bo‘lgan haykal tajovuzkor namoyishchilar hujumiga uchrashi be’manilik va sharmandalik. Albatta, Cherchill ba’zida hozirgi zamonga mos kelmaydigan qarashlari bilan ham bo‘lishgan. Ammo u qahramon bo‘lgan va uning xotirasi yodgorlik orqali saqlanib qolinishi kerak”, — deb yozadi Britaniya hukumati rahbari.

Jonson ushbu yodgorlik bundan oldingi avlod vakillari tomonidan o‘rnatilganini, u vaqtlarda insonlarning qarashlari boshqacha bo‘lganini ham eslatib o‘tgan.

“Bu kabi haykallar bizga o‘tmishimizni yodga soladi, xususan, xatolarimizni ham. Yodgorliklarni buzib tashlash — bu o‘z tarixi haqida yolg‘on gapirish bilan barobar”, — deydi Jonson.

Boris Jonsonning ta’kidlashicha, norozilik namoyishlari maqsadi zo‘ravonlik bo‘lgan ekstremistlar nazorati ostida qolmoqda. Biroq u tinch yo‘l bilan irqchilikka qarshi namoyish o‘tkazayotganlar xohishini tushinishini bildirgan. Uning so‘zlariga ko‘ra, Buyuk Britaniya irqchilikka qarshi kurash borasida ulkan natijalarga erishgan, biroq oldinda bajarilishi kerak bo‘lgan ishlar ham ko‘p.

Irqchilikka qarshi norozilik namoyishlari AQShda afroamerikalik Jorj Floydning Minneapolisda qo‘lga olinishi paytida vafot etganidan keyin boshlandi. Vaqt o‘tishi bilan bu harakatlar Yevropa mamlakatlarida, jumladan, Buyuk Britaniyada ham boshlandi. Ko‘p hollarda norozilik namoyishlari bosqinchilik va politsiya bilan to‘qnashuvlar bilan yakunlanmoqda.

Avvalroq AQSh shaharlarida Xristofor Kolumbning haykallari vandallar hujumiga uchrayotgani to‘g‘risida xabar berilgandi.