AQSh IShID terrorchilik tahdidlarining kamaygani natijasida Iroq hududidan o‘z harbiylarini olib chiqib ketish ishlarini davom ettirmoqchi. AQSh davlat departamenti Iroq bilan strategik muloqot sessiyalaridan keyin e’lon qilgan bayonotda ham ushbu ma’lumot rasmiy tasdig‘ini topgan.
“Ikkala mamlakat ham IShID tahdidlariga qarshi kurashda sezilarli natijalarga erishganini qayd etib keyingi oylarda AQSh harbiylari sonini kamaytirish hamda Iroq hukumati bilan mamlakatda qoladigan harbiylarni qaysi ishlarga safarbar etish masalalari muhokama qilinmoqda”, — deyilgan bayonotda.
AQSh rasmiylari Iroqda muntazam faoliyat yuritadigan harbiy bazalarga ega bo‘lish yoki o‘z harbiylarining doimiy ravishda ushbu hududda bo‘lishining tarafdori emasligini aytgan.
Eslatib o‘tamiz, 2020-yilning yanvarida Iroq barcha xorijlik harbiylarning o‘z hududidan chiqib ketishini talab qilgan, AQSh esa bunga javoban Iroq hududidagi Eron generali Qosim Sulaymoniyni Bag‘dodda o‘ldirgan. Ushbu voqeadan keyin AQSh davlat departamenti Iroqdan harbiylarni olib chiqib ketish rejalashtirilmaganini, Donald Tramp esa o‘z qo‘shini chiqib ketadigan bo‘lsa Iroq hukumati mamlakatdagi harbiy bazalar, elchixonalar qurilishiga sarflangan pullarni qaytarishi lozimligini qayd etgan.
IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Izoh (0)