Борис Жонсон намойишчиларнинг британиялик буюк шахсларга атаб ўрнатилган ёдгорликларни бузиб ташлаш тўғрисидаги талабини рад этди

Радикал ҳаракат аъзолари сўнгги кунларда кўплаб мамлакатларда ирқчиликка қарши ўтказилаётган норозилик намойишларини ўз назорати остига олган. Бу ҳақда Буюк Британия бош вазири Борис Жонсон ўзининг Twitter’даги саҳифаси орқали маълум қилди.

Жонсоннинг ёзишича, у ирқчиликка қарши кураш доирасида Британия кўчаларидан буюк тарихий шахсларга қўйилган ёдгорликларни олиб ташлаш тўғрисидаги таклифни қоралайди. Хусусан, у собиқ бош вазир Уинстон Черчилль ва унинг Лондон марказидаги ҳайкалига ҳужум қилишдан сақланишга чақирди.

«Бу — доимо Черчилль ўз давлатини ва бутун Европани фашистик ва ирқчилик золимлигидан қутқарганини ёдга солиб туради. Миллат учун муҳим бўлган ҳайкал тажовузкор намойишчилар ҳужумига учраши беъманилик ва шармандалик. Албатта, Черчилль баъзида ҳозирги замонга мос келмайдиган қарашлари билан ҳам бўлишган. Аммо у қаҳрамон бўлган ва унинг хотираси ёдгорлик орқали сақланиб қолиниши керак», — деб ёзади Британия ҳукумати раҳбари.

Жонсон ушбу ёдгорлик бундан олдинги авлод вакиллари томонидан ўрнатилганини, у вақтларда инсонларнинг қарашлари бошқача бўлганини ҳам эслатиб ўтган.

«Бу каби ҳайкаллар бизга ўтмишимизни ёдга солади, хусусан, хатоларимизни ҳам. Ёдгорликларни бузиб ташлаш — бу ўз тарихи ҳақида ёлғон гапириш билан баробар», — дейди Жонсон.

Борис Жонсоннинг таъкидлашича, норозилик намойишлари мақсади зўравонлик бўлган экстремистлар назорати остида қолмоқда. Бироқ у тинч йўл билан ирқчиликка қарши намойиш ўтказаётганлар хоҳишини тушинишини билдирган. Унинг сўзларига кўра, Буюк Британия ирқчиликка қарши кураш борасида улкан натижаларга эришган, бироқ олдинда бажарилиши керак бўлган ишлар ҳам кўп.

Ирқчиликка қарши норозилик намойишлари АҚШда афроамерикалик Жорж Флойднинг Миннеаполисда қўлга олиниши пайтида вафот этганидан кейин бошланди. Вақт ўтиши билан бу ҳаракатлар Европа мамлакатларида, жумладан, Буюк Британияда ҳам бошланди. Кўп ҳолларда норозилик намойишлари босқинчилик ва полиция билан тўқнашувлар билан якунланмоқда.

Аввалроқ АҚШ шаҳарларида Христофор Колумбнинг ҳайкаллари вандаллар ҳужумига учраётгани тўғрисида хабар берилганди.