Ukraina prezidenti Vladimir Zelenskiy rafiqasi Yelenada koronavirus infeksiyasi aniqlangani munosabati bilan maxsus ish rejimiga o‘tmoqda. Bu haqda 12-iyun kuni Prezident ofisi matbuot xizmati ma’lum qildi.
Avvalroq Zelenskiyning rafiqasi Yelenada koronavirus aniqlanib, u boshqa oila a’zolaridan ajratilgan holda ambulatoriya sharoitida davolanayotgani haqida xabar berilgandi. Vladimir Zelenskiyning o‘zi va farzandlarida o‘tkazilgan test natijalari esa salbiy chiqqan.
“Ukraina Konstitutsiyasida o‘zini izolyatsiya qilish va karantin holatlari ko‘zda tutilmagan. Shu sababli prezident ish vaqti to‘g‘risida maxsus protokol qabul qilindi. Prezident jismoniy muloqot doirasini cheklaydi, majlislarni onlayn rejimga o‘tkazadi. Davlat rahbari bilan shaxsiy muloqotni ko‘zda tutuvchi yuzma-yuz uchrashuvlar yaqin kunlar uchun bekor qilinadi”, — deyiladi prezident ofisi xabarida.
Shuningdek, u ommaviy tadbirlarda ishtirok eta olmaydi, Kiyev tashqarisidagi ish safarlari bekor qilinadi, shaxsiy muloqot doirasi esa soqchilar va eng yaqin yordamchilargacha qisqartiriladi.
Davlat rahbari har kuni tibbiy ko‘rikdan va koronavirusni aniqlash bo‘yicha testdan o‘tkaziladi.
“Ushbu protokoldan istisnolar davlat rahbarining konstitutsiyaviy vakolatlariga muvofiq zudlik bilan javob berishni talab etadigan favqulodda holatlar yuzaga kelgandagina mumkin”, — deya qo‘shimcha qilingan xabarda.
Eslatib o‘tamiz, bir necha kun oldin Vladimir Zelenskiy xalqini qo‘llab-quvvatlash uchun koronavirus yuqtirishga tayyorligini bildirgandi.
Izoh (0)