Ijtimoiy tarmoqlarda 11-iyun kuni Qo‘shko‘pir tumanida bir necha ayol boshqa bir ayolni urib, sochlarini kesib “samosud” qilgani aks etgan video tarqalgandi. Ichki ishlar huzuridagi Tergov departamenti mazkur videolavha yuzasidan rasmiy ma’lumot berdi.
Ma’lumotlarga ko‘ra, 9-iyun kuni taxminan soat 22:40 da Qo‘shko‘pir tumani “Ittifoq” mahallasida yashovchi 20 yoshli H.O. dugonalari bilan birgalikda yashash uyiga kelayotganida, oldiga 31 yoshli S.D. boshqaruvidagi Nexia avtomashinasi kelib to‘xtagan va avtomashinadan shu mahallada yashovchi uch nafar ayol tushgan.
Ta’kidlanishicha, mashinadan tushganlar H.O.ni “Sen nima uchun o‘g‘lim va kelinimni turmushini buzib, buzg‘unchilik qilib yuribsan” deb har xil so‘zlar bilan haqorat qilib, urib tan jarohati yetkazgan hamda ushbu holatni shu yerda bo‘lgan S.D. o‘zining uyali telefon apparatiga videotasvirga olib turgan.
Ma’lum bo‘lishicha, H.O. shu mahallada yashovchi ayollardan birining o‘g‘li — S.D. bilan 2016-yildan buyon yashab kelgan, hozirda bir nafar farzandi bor.
Sud-tibbiy ekspertiza xulosasida H.O.ning chap bilak, chap-o‘ng yelka, boldir, chap son va ko‘krak qafasi qontalashlari bo‘lib, yengil tan jarohati olganligi aniqlangan.
Mazkur holat yuzasidan Qo‘shko‘pir tumani bo‘yicha IIO FMB huzuridagi tergov bo‘linmasi tomonidan ayolni kaltaklaganlarga nisbatan Jinoyat kodeksining 277-moddasi (“Bezorilik”) 2-qismi “b, g” bandlari bilan jinoyat ishi qo‘zg‘atilgan.
Hozirda dastlabki tergov harakatlari olib borilmoqda.