Ижтимоий тармоқларда 11 июнь куни Қўшкўпир туманида бир неча аёл бошқа бир аёлни уриб, сочларини кесиб «самосуд» қилгани акс этган видео тарқалганди. Ички ишлар ҳузуридаги Тергов департаменти мазкур видеолавҳа юзасидан расмий маълумот берди.
Маълумотларга кўра, 9 июнь куни тахминан соат 22:40 да Қўшкўпир тумани «Иттифоқ» маҳалласида яшовчи 20 ёшли Ҳ.О. дугоналари билан биргаликда яшаш уйига келаётганида, олдига 31 ёшли С.Д. бошқарувидаги Nexia автомашинаси келиб тўхтаган ва автомашинадан шу маҳаллада яшовчи уч нафар аёл тушган.
Таъкидланишича, машинадан тушганлар Ҳ.О.ни «Сен нима учун ўғлим ва келинимни турмушини бузиб, бузғунчилик қилиб юрибсан» деб ҳар хил сўзлар билан ҳақорат қилиб, уриб тан жароҳати етказган ҳамда ушбу ҳолатни шу ерда бўлган С.Д. ўзининг уяли телефон аппаратига видеотасвирга олиб турган.
Маълум бўлишича, Ҳ.О. шу маҳаллада яшовчи аёллардан бирининг ўғли — С.Д. билан 2016 йилдан буён яшаб келган, ҳозирда бир нафар фарзанди бор.
Суд-тиббий экспертиза хулосасида Ҳ.О.нинг чап билак, чап-ўнг елка, болдир, чап сон ва кўкрак қафаси қонталашлари бўлиб, енгил тан жароҳати олганлиги аниқланган.
Мазкур ҳолат юзасидан Қўшкўпир тумани бўйича ИИО ФМБ ҳузуридаги тергов бўлинмаси томонидан аёлни калтаклаганларга нисбатан Жиноят кодексининг 277-моддаси («Безорилик») 2-қисми «б, г» бандлари билан жиноят иши қўзғатилган.
Ҳозирда дастлабки тергов ҳаракатлари олиб борилмоқда.
Изоҳ (0)