Qirg‘iziston prezidenti So‘ronbay Jeenbekov O‘zbekiston bilan iqtisodiy aloqalarni mustahkamlashdan manfaatdorligini bildirdi va ikki mamlakat o‘rtasidagi munosabatlarni “uzoqdagi qarindoshdan, yaqindagi qo‘shni yaxshi”, deya ta’rifladi. Qirg‘iziston prezidenti matbuot xizmatining xabar berishicha, bu haqda u O‘sh viloyati Aravon tumani aholisi bilan uchrashuv davomida aytib o‘tgan.
“Uzoqdagi qarindoshdan, yaqindagi qo‘shni yaxshi. Qirg‘iz va o‘zbek xalqlari asrlar davomida do‘stlikda yonma-yon yashab kelishgan. Ota-bobolarimiz ikki xalqning birligini saqlab, bir-biriga yaqin edilar. Ikki mamlakat nafaqat jug‘rofiy jihatdan bir-biriga yaqin, balki bizda bitta tarix, bitta din, bitta til va o‘xshash urf-odatlar mavjud”, — degan So‘ronbay Jeenbekov.
Shuningdek, prezident so‘nggi yillarda Qirg‘iziston va O‘zbekiston o‘rtasida nafaqat savdo-iqtisodiy, balki madaniy-gumanitar aloqalar ham faol rivojlantirayotganini ta’kidladi.
“O‘zbekistonda prezidentlikka Shavkat Miromonovich Mirziyoyev kelishi bilan Qirg‘iziston va O‘zbekiston o‘rtasidagi do‘stlik va yaxshi qo‘shnichilik mustahkamlandi. Biz yaxshi qo‘shnichilik va o‘zaro manfaatli munosabatlarni saqlashga intilamiz, barcha muammolarni hal qilamiz, buning uchun sabr va vaqt kerak. Biz farzandlarimiz va mamlakatimiz kelajagi uchun qo‘shni davlatlar bilan do‘stlikni mustahkamlash siyosatini davom ettiramiz”, — dedi davlat rahbari.
Eslatib o‘tamiz, 31-may kuni O‘zbekistonning So‘x tumani Chashma qishlog‘i va Qirg‘izistonning Qadamjoy tumani Chechme qishlog‘i aholisi o‘rtasida Qirg‘iziston hududida joylashgan, suvidan O‘zbekiston ham foydalanadigan Chashma bulog‘i ustida bahs chiqib, katta mojaroga aylanib ketgan. Hodisa oqibatida 187 nafar o‘zbekistonlik tan jarohati olgan, O‘zbekiston hududidagi uchta xonadonda yong‘in chiqqandi.
O‘zbekiston bosh vaziri Abdulla Aripov 1-iyun kuni voqea yuz bergan joyga tashrif buyurib, aholi bilan uchrashgan, shuningdek, Qirg‘iziston rasmiylari bilan hodisa yuzasidan muzokara olib borgandi. Shu kuni O‘zbekiston va Qirg‘iziston prezidentlari mazkur hodisani telefon orqali muhokama qilgan edi.
Shavkat Mirziyoyev 6-iyun kuni Farg‘ona shahrida viloyat va tumanlar hokimlari, soha va tarmoqlar rahbarlari, jamoatchilik vakillari ishtirokidagi yig‘ilishda o‘tgan hafta So‘x tumanida bo‘lgan voqealarga ham to‘xtalib, “So‘xdagi voqealar qirg‘iz xalqi bilan do‘stligimizga, bordi-keldimizga ta’sir qilmasligi kerak”, deb aytgandi.
Izoh (0)