Moliya vazirligi huzuridagi budjetdan tashqari Pensiya jamg‘armasi 1-may holatiga ko‘ra, O‘zbekistonda pensiya va nafaqa oluvchilarning umumiy soni 3 734 230 nafarga yetganini ma’lum qildi.
Bu 1991-yil 1-yanvar holatiga (2 158 995 nafarga) nisbatan 1 575 235 nafarga yoki 42,2 foizga ko‘p demak.
Ma’lumotlarga ko‘ra, pensiya va nafaqa oluvchilarning umumiy aholi sonidagi ulushda ham o‘sish bor. 1991-yilda 10,4 foizni tashkil etgan bo‘lsa, bugungi kunda 11 foizni tashkil qilib, 0,6 foizga ortgan.
Pensiya va nafaqa oluvchilar hududlar kesimida olib qaralsa, ularning 13,3 foizi Toshkent shahriga, 12,3 foizi esa Navoiy viloyatiga to‘g‘ri keladi. Shuningdek, Toshkent, Buxoro, Farg‘ona, Sirdaryo, Andijon viloyatlarida 11 foizdan ortiq va Xorazmda — 11 foizni tashkil etadi. Boshqa hududlarning 9 foizdan 10 foizgacha bo‘lgan aholisi pensiya va nafaqa oluvchilarga to‘g‘ri keladi.
Aholining ijtimoiy zaif qatlamlarini, nogironligi bo‘lgan shaxslar, pensiya va nafaqa oluvchilarni yanada ijtimoiy qo‘llab-quvvatlash uchun qulay shart-sharoitlarni yaratish hamda respublika fuqarolarini ijtimoiy qo‘llab-quvvatlashni kuchaytirish maqsadida O‘zbekiston Prezidentining farmonlariga asosan 1991—2020-yillarda pensiya va nafaqalarning miqdori 64 marotaba oshirildi. 1991-yil 1-yanvar holatiga pensiyalarning o‘rtacha miqdori 96 so‘m 50 tiyin bo‘lgan bo‘lsa, 2020-yil 1-may holatiga 747 480 so‘mga yetgan.
Avvalroq O‘zbekistonda pensiya tayinlashda talab qilinadigan yana bir hujjat turi soddalashtirilgani to‘g‘risida xabar berilgandi.
Izoh (0)